Baloğlan Əşrəfovun az tanınan mahnısının sirri açıldı

Əməkdar artist, mərhum müğənni Baloğlan Əşrəfovun geniş auditoriyaya tanış olmayan "Seviləydi sevənlər" mahnısı sosial şəbəkələrdə yenidən gündəmə gəlib.

Mahnının paylaşılmasından sonra izləyicilər arasında müxtəlif müzakirələr aparılıb. Bəzi istifadəçilər bu əsəri Baloğlan Əşrəfovun ifasında televiziya efirlərində heç vaxt eşitmədiklərini bildiriblər.

Digərləri isə mahnının vaxtilə efirlərdə səsləndirilməsinə müəyyən məhdudiyyət qoyulduğunu iddia ediblər.

Məsələyə aydınlıq gətirən mərhum sənətkarın oğlu Peyman Əşrəfov Qaynarinfo-ya bildirib ki, sözügedən əsər 20-30 il əvvəl məhz Baloğlan Əşrəfov üçün yazılıb:

"Seviləydi sevənlər" mahnısının musiqisi Cavanşir Quliyevə, sözləri Zemfira Quliyevaya məxsusdur. Atam onu ifa edib. Televiziya proqramlarına dəvət alanda isə hər veriliş fərqli mahnı sifariş edirdi. Vaxt məhdudiyyəti səbəbindən bu mahnı efirlərdə səslənmirdi".

Peyman Əşrəfov bildirib ki, atasının bu günə qədər geniş yayılmayan başqa ifaları da var:

"Cavanşir Quliyev bu mahnını yalnız atam üçün yazmışdı və başqa heç bir müğənniyə verməmişdi. Həmin dövrdə bəstəkarlar əsərlərini adətən konkret ifaçı üçün bəstələyirdilər. Atam Cavanşir Quliyevin çoxsaylı mahnılarını oxuyub, amma bu mahnının taleyi belə gətirib".

Telegramda izləyin