Yaşıl iqtisadiyyat və gələcəyin iqtisadi modeli - AÇIQLAMA

Yaşıl iqtisadiyyat nədir? Yaşıl iqtisadiyyat təbiətlə dost, ağıllı iqtisadiyyatdır. Planetə zərər vermədən işləmək, istehsal etmək -yaşıl iqtisadiyyat budur. Yaşıl iqtisadiyyatda az tullantı ilə çox fayda əldə edirik, ekologiya daha təmiz qalır. Yenidən istifadə və təkrar emal əsasdır. Bəs yaşıl iqtisadiyyat gələcəkdə ənənəvi iqtisadi modeli əvəz edə bilərrmi və bu keçidin ölkələrin iqtisadi inkişafına hansı təsirləri ola bilər?

Mövzu ilə bağlı Sonxeber.az-a açıqlama verən iqtisadçı-ekspert Eldəniz Əmirov yaşıl iqtisadiyyatın mahiyyətindən danışıb:

"Sözün düzü mən düşünmürəm ki, yaşıl iqtisadiyyat ənənəvi iqtisadi modeli tamamilə əvəz edə biləcəkdir. Ona görə də hazırki proseslərdə düşünürəm ki, ən doğru yanaşma bu olardı ki, ənənəvi iqtisadi model özü tədricən bir qədər transformasiya edəcəkdir və paralel olaraq da yaşıl iqtisadiyyat ayrıca qol kimi deyil, ənənəvi iqtisadi modelin transformasiyasında bir faktor olaraq yüksələcəkdir. Yəni bu proses düşünürəm ki, əslində başlayıb ona görə ki, həm ayrı-ayrı ölkələrin iqtisadi siyasətində, eyni zamanda beynəlxalq enerji agentliyinin hesablamasında onların verdiyi tövsiyələrdə bu tip yanaşmalar artıq görünür"

Ekspert statistik göstəriciləri açıqlayıb:

"Belə ki ,2025-ci ilə də dünyada enerji sektorunda yatırılan 3,3 trilyon dollarlıq investisiyanın təxminən 2,2 trilyon dolları məhz təmiz enerji texnologiyalarına yönəlib. Oradan cəmi 1,1 trilyonu neft-qaz və kömürə yönəlib. Bu təxminən 66 faizin 33 faizə nisbəti deməkdir. Kifayət qədər böyük bir istiqamətdir. Yəni qlobal investisiyada da, ayr-ayrı ölkələrdə də(bir neçə ölkə istisna olmaqla) yaşıl enerji istiqaməti çox böyük xüsusi çəkiyə malikdir"

İqtisadçı son olaraq vurğulayıb ki, yaşıl iqtisadiyyat yalnız günəş və külək enerjisindən ibarət iqtisadi sistem deyil. Onun sözlərinə görə, ətraf mühitə zərər vurmadan,təbiətə zərər vermədən həyata keçirilən istənilən iqtisadi davranış həm də özündə yaşıl iqtisadiyyatın elementlərini ehtiva edir:

"Yəni məsələn elektrik nəqliyyatıdır, enerji səmərəliliyidir, tullantıların təkrar emalıdır, yaşıl tikintidir. Ümumiyyətlə yeni sənaye texnologiyalarının tətbiqidir, enerjinin saxlanması üçün sistemlərdir, yaşıl maliyyə alətləridir və sair kimi istiqamətlərdə olan fəaliyyət yaşıl iqtisadiyyatın düşünürəm ki, kateqoriyaları kimi qəbul edilməlidir"

Lalə Məmmədova

Telegramda izləyin