16 yaşlı qız xəstəxananın tualetində doğuş etdi: Körpəni zibil qutusuna atdı - VİDEO

Türkiyənin Mersin vilayətinin Erdemli rayonunda qarın ağrısı şikayəti ilə xəstəxanaya müraciət edən 16 yaşlı H.E.Y.-nin tualetdə doğuş etdiyi və yeni doğulan qız körpəsini zibil qutusuna qoyduğu iddia edilir.

Sonxeber.az xarici mediaya istinadla xəbər verir ki, anası ilə birlikdə Erdemli Dövlət Xəstəxanasına gələn yeniyetmə müayinə üçün gözlədiyi vaxt tualetə daxil olub. Burada doğuş etdikdən sonra körpənin göbək bağını kəsərək onu zibil qutusuna qoyduğu və daha sonra palataya qayıtdığı bildirilir.

Təxminən yarım saat sonra tualeti təmizləyən əməkdaş körpəni aşkar edərək tibb işçilərinə xəbər verib. Körpə təcili müdaxilədən sonra yenidoğulmuşlar şöbəsinə yerləşdirilib və müalicəyə alınıb.

Polisin araşdırması zamanı xəstəxananın təhlükəsizlik kameraları da incələnib. İki gün xəstəxanada polis nəzarətində müalicə olunan H.E.Y. ilkin ifadəsində qorxu və panika səbəbindən körpəni zibil qutusuna qoyduğunu deyib.

Yeniyetmə hamiləliyin əmisi oğlu ilə yaşadığı münasibət nəticəsində baş verdiyini iddia edib. Bu açıqlama ilə bağlı ayrıca hüquqi araşdırma başladılıb.

Müalicəsi başa çatdıqdan sonra H.E.Y. "qəsdən öldürməyə cəhd" ittihamı ilə həbs edilib. Anası R.H. isə məhkəmə nəzarəti şərti ilə sərbəst buraxılıb. Hadisə ilə bağlı istintaq davam edir.

Telegramda izləyin