Azərbaycanlı tennisçi Cahangir Aslanov beynəlxalq turnirin qalibi oldu

Azərbaycanı beynəlxalq arenada təmsil edən gənc tennisçi Cahangir Aslanov növbəti uğuruna imza atıb.

BiG.AZ xəbər verir ki, 11 aprel 2016-cı il təvəllüdlü Cahangir Aslanov ilk dəfə 5 yaşında müəllimi Fərid Şirinovun rəhbərliyi ilə tennis məşqlərinə başlayıb. Müəlliminin sözlərinə görə, Cahangir ilk məşqlərdən etibarən tennisə böyük maraq göstərib və bu idman növünü öyrənmək onun üçün asan alınıb. Xüsusilə topu yaxşı hiss etməsi və çevik ayaq hərəkətləri ilə seçilib.

Cahangir Aslanov 11-17 avqust tarixlərində Tbilisidə keçirilən beynəlxalq səviyyəli Ten-Pro Global Junior Tour - Georgia Cup / Georgia Bowl turnirində Azərbaycanı təmsil edib. Gənc tennisçi yarışda uğurlu çıxış edərək 1-ci yerə layiq görülüb.

Turnirdə digər azərbaycanlı tennisçi Mansur Alixanbəyli isə 2-ci yeri tutub.

Qeyd edək ki, Cahangir Aslanov 2023-cü ildə keçirilən Bakı Çempionatında da iştirak edib və ilk dəfə yarışın qalibi olub. O, 2026-cı ilin əvvəlində keçirilən Bakı Çempionatında 2-ci, sonuncu Bakı Çempionatında isə 3-cü yerə sahib çıxıb.

Cahangir Aslanov və Mansur Alixanbəyli ölkəmizdə 10 yaşadək yeniyetmələr arasında keçirilən beynəlxalq səviyyəli turnirdə mükafatçı yerlər tutan ilk azərbaycanlı tennisçilər kimi tarixə düşüblər.

Gənc tennisçimiz Cahangir Aslanova gələcək idman karyerasında yeni uğurlar arzulayırıq!
Müəllif: İlkin Məmmədkərimov

Telegramda izləyin