Evə girməyə çalışan iki qadın saxlanıldı - üzərlərindən görün nə çıxdı - VİDEO

Türkiyənin Adana şəhərində evin qapısını açmağa çalışarkən məhəllə sakinləri tərəfindən yaxalanan iki qadının polisə verdiyi ifadələr üzə çıxıb.

Sonxeber.az xarici mediaya istinadla xəbər verir ki, hadisə zamanı özünü yerə ataraq qıcolma təqlidi edən 26 yaşlı Yeter U. və onun epilepsiya tutması keçirdiyini iddia edən 24 yaşlı Gökçe U. polis tərəfindən saxlanılıb. Şübhəlilərin üzərindən qapı açmaq üçün istifadə edildiyi bildirilən alət aşkarlanıb.

Hadisə avqustun 31-də saat 15:30 radələrində Seyhan rayonunun Küçükdikili məhəlləsində baş verib. Gökçe U. və Yeter U. Fatma Kılavuzun evinin qapısını açmağa çalışıblar. Vəziyyəti görən ev sahibi evin qarşısına çıxanda şübhəlilər qaçmağa başlayıblar.

Məhəllə sakinləri qadınların arxasınca düşərək onları yaxalayıblar. Bu zaman Yeter U. özünü yerə ataraq çırpınmağa başlayıb. Gökçe U. isə onun epilepsiya xəstəsi olduğunu və tutma keçirdiyini iddia edərək təcili yardım çağırılmasını istəyib.

Ev sahibi Fatma Kılavuz isə qadınların özlərini xəstə kimi göstərdiklərini düşünərək buna etiraz edib və yaşananları mobil telefonla lentə alıb.

Kılavuzun məlumatı əsasında əraziyə polis əməkdaşları göndərilib. Polis gələn zaman Yeter U.-nun özünə gəldiyi müşahidə olunub. Şübhəlilərin üzərində axtarış aparan polis əməkdaşları qapı açmaq üçün istifadə edildiyi bildirilən maymuncuq aşkar ediblər.

Araşdırma zamanı Yeter U.-nun 80, Gökçe U.-nun isə 20 ayrı cinayət üzrə qeydiyyatının olduğu müəyyənləşib.

Fatma Kılavuz bundan təxminən 3 ay əvvəl də evinə oğru girdiyini və təqribən 1,5 milyon türk lirəsi dəyərində qızıl-zinət əşyalarının oğurlandığını bildirib. O, saxlanılan qadınlardan şikayətçi olub.

Polisdə ifadə verən Yeter U. və Gökçe U. isə məqsədlərinin oğurluq olmadığını, ehtiyacı olan insanlara çatdırmaq üçün yardım toplamağa çıxdıqlarını iddia ediblər.

İstintaq tədbirlərindən sonra məhkəməyə göndərilən Yeter U. və Gökçe U. barəsində həbs qərarı çıxarılıb.

Telegramda izləyin