Dənizdə boğulma təhlükəsi keçirən müəllim 8 gün sonra həyatını itirdi

Türkiyənin Samsun şəhərinin 19 Mayıs rayonunda sərinləmək üçün dənizə girən ibtidai sinif müəllimi İbrahim Çakmak boğulma təhlükəsi keçirib. Xəstəxanaya yerləşdirilən müəllim 8 gün davam edən həyat mübarizəsindən sonra dünyasını dəyişib.

Sonxeber.az xarici mediaya istinadla xəbər verir ki, hadisə avqustun 26-da Dereköy ərazisindəki sahildə baş verib. Mustafa Erdin İbtidai Məktəbində müəllim işləyən İbrahim Çakmak sərinləmək üçün dənizə girib. Bir müddət sonra onun suda çabaladığını və boğulmaq təhlükəsi ilə üzləşdiyini görən ətrafdakı insanlar dərhal köməyə gəlib və Çakmakı sudan çıxarıblar.

Hadisə barədə 112 Təcili Çağrı Mərkəzinə məlumat verildikdən sonra əraziyə təcili tibbi yardım və təhlükəsizlik əməkdaşları göndərilib.

Hadisə yerində ilkin tibbi yardım göstərildikdən sonra İbrahim Çakmak təcili tibbi yardım avtomobili ilə Ondokuz Mayıs Universitetinin Tibb Fakültəsi Xəstəxanasına çatdırılıb. O, reanimasiya şöbəsində müalicə olunub.

Həkimlərin səylərinə baxmayaraq, 8 gün davam edən həyat mübarizəsindən sonra müəllimi xilas etmək mümkün olmayıb.

Çakmakın meyiti yarılma proseduru üçün Samsun Ədli Tibb Qrup Rəhbərliyinin morquna aparılıb.

Hadisə ilə bağlı araşdırma davam edir. Müəllimin ölümü təhsil ictimaiyyətini və yaxınlarını kədərə boğub.

Telegramda izləyin