Başqalarının fikrinə həddindən artıq önəm vermək özünəinam probleminin göstəricisidir? - AÇIQLAMA

Bəzi insanlar qərar verərkən öz istəklərindən çox ətrafındakıların nə düşünəcəyini nəzərə alırlar.

"Görəsən, məni necə qiymətləndirəcəklər?", "Bunu etsəm, haqqımda nə düşünərlər?" kimi suallar zamanla insanın gündəlik seçimlərinə də təsir edə bilər.

Bəs başqalarının fikrinə həddindən artıq önəm vermək özünəinam probleminin göstəricisidir, yoxsa insanın cəmiyyət tərəfindən qəbul olunmaq ehtiyacından qaynaqlanır?

Psixoloq Gülsər Qədirli bu barədə Sonxeber.az -a açıqlama verib:

"İnsanın başqalarının fikrini nəzərə alması özlüyündə problem hesab olunmur. İnsan sosial varlıqdır və ətrafındakı insanların münasibəti, rəyi və reaksiyası onun üçün müəyyən qədər əhəmiyyət daşıyır. Problem bu ehtiyacın insanın öz qərarlarını verməsinə mane olduğu zaman ortaya çıxır.

Daim "başqaları mənim haqqımda nə düşünəcək?" sualı ilə yaşamaq çox zaman özünəinamın zəifləməsi ilə əlaqəli ola bilər. Belə insan öz qərarına, seçimlərinə və dəyərinə kifayət qədər güvənmədikdə təsdiqi kənardan almağa çalışır. Məsələn, geyim seçərkən, münasibət qurarkən, iş dəyişərkən və hətta şəxsi fikrini bildirərkən belə əsas meyar öz istəyi yox, ətrafın reaksiyası ola bilər.

Digər tərəfdən, burada sosial qəbul olunmaq ehtiyacı da mühüm rol oynayır. İnsan rədd edilməkdən, tənqid olunmaqdan və qrupdan kənarda qalmaqdan qorxduğu üçün öz davranışlarını başqalarının gözləntilərinə uyğunlaşdırmağa başlaya bilər. Xüsusilə uşaqlıqdan "el nə deyər?", "başqaları sənin haqqında nə düşünər?" kimi mesajlarla böyüyən insanlarda bu yanaşma daha güclü formalaşa bilər. Bu iki amil bir-birindən tam ayrı deyil. Çox vaxt sosial qəbul olunmaq ehtiyacı özünəinamın zəifliyi ilə birlikdə müşahidə olunur. İnsan özünü daxildən kifayət qədər dəyərli hiss etmədikdə, bu dəyəri başqalarının münasibəti ilə ölçməyə başlayır.
Əsas məsələ insanın özünə bu sualı verə bilməsidir: "Mən bunu həqiqətən istəyirəm, yoxsa başqalarının məndən gözləntisinə uyğun davranıram?" Əgər insan uzun müddət öz seçimlərini başqalarının reaksiyasına görə müəyyənləşdirirsə və "yox" demək, tənqidi qəbul etmək və öz fikrində qalmaq onun üçün ciddi çətinlik yaradırsa, bunun üzərində işləmək faydalı olar".

Telegramda izləyin