ABŞ-da 21 yaşlı hərbçi 12 yaşlı qızla hotel otağında saxlanıldı - VİDEO

ABŞ-ın Ohayo ştatında itkin düşdüyü bildirilən 12 yaşlı qızın axtarışları zamanı 21 yaşlı hərbçi Jayden Fox saxlanılıb. O, azyaşlı ilə internet vasitəsilə tanış olmaqda və daha sonra onunla otel otağında görüşməkdə ittiham olunur.

Sonxeber.az xarici mediaya istinadla xəbər verir ki, Montville polisi avqustun 14-də Willowick şəhərindən qaçdığı bildirilən 12 yaşlı qızın tapılması üçün araşdırmaya başlayıb. Polis əməkdaşları uşağın mobil telefonundan gələn siqnalı izləyərək Montville Township ərazisində yerləşən otelə gediblər.

Araşdırma zamanı müəyyən edilib ki, Florida ştatının Palatka şəhərindən olan 21 yaşlı Jayden Fox azyaşlı ilə internet vasitəsilə tanış olub. ABŞ ordusunda xidmət edən Fox hadisə zamanı dörd günlük məzuniyyətdə olub. Onun Şimali Karolinadakı Fort Bragg hərbi bazasından Ohayo ştatına gedərək 12 yaşlı qızı Willowick ərazisindən götürdüyü və daha sonra onunla birlikdə Montville Township-ə getdiyi bildirilib.

Polis uşağın telefonunun yerini müəyyən etdikdən sonra onu Foxun kirayələdiyi otel otağında tapıb. Qız təhlükəsiz şəkildə ailəsinə təhvil verilib.

Toplanan məlumatlar əsasında Jayden Fox saxlanılıb. Ona birinci dərəcəli ağır cinayət kimi qiymətləndirilən zorlama ittihamı irəli sürülüb. Fox Medina County həbsxanasına göndərilib və onun üçün 2 milyon dollar məbləğində girov müəyyən edilib.

Polis araşdırmanın davam etdiyini açıqlayıb. Bildirilib ki, istintaq zamanı yeni sübutlar əldə olunarsa, Foxa qarşı əlavə ittihamlar da irəli sürülə bilər.

Hadisənin bütün təfərrüatlarının müəyyənləşdirilməsi üçün Medina County Prokurorluğu və digər aidiyyəti qurumlar da istintaqa cəlb olunub.

Telegramda izləyin