Məşhur müğənni konsertdə səhnəni tərk etdi, dava düşdü - VİDEO

Türkiyəli məşhur müğənni Kurtuluş Kuşun Malatyada verdiyi konsert gözlənilməz hadisə səbəbindən yarımçıq qalıb.

Sonxeber.az xarici mediaya istinadla xəbər verir ki, müğənninin səhnə ilə tamaşaçılar arasındakı məsafənin azaldılması ilə bağlı tələbi yerinə yetirilməyib. Bundan sonra Kuş səhnəni tərk edib və konsert məkanında qarşıdurma yaşanıb.

"Sevmedim Deme", "Rüya Gibi", "Baba Yak", "Karalaya Karalaya", "Nabız" və "Manolya" kimi mahnıları ilə tanınan Kurtuluş Kuş Malatyada bir dərnəyin təşkil etdiyi tədbir çərçivəsində səhnəyə çıxıb.

Lakin konsert zamanı gözlənilməz böhran yaşanıb. İddiaya görə, sənətçi ilə tamaşaçıların olduğu hissə arasında təxminən 200 metrlik məsafə saxlanılıb. Stulların yerləşdirildiyi ərazidə səhnə ilə tamaşaçılar arasında protokol bölməsi yaradılıb.

Kurtuluş Kuşun isə tamaşaçılara daha yaxın və onlarla iç-içə konsert vermək istədiyi bildirilib. Müğənni bunun üçün təşkilatçılardan aradakı maneələrin və protokol bölməsinin aradan qaldırılmasını istəyib. Tələbi yerinə yetirilmədikdə isə buna etiraz edib.

İddiaya görə, Kuş səhnədən "Oradakı insanlar bura gəlmədiyi müddətcə mən gedirəm" deyərək çıxışını dayandıracağını bildirib.

Gərginliyin ardından məşhur müğənni konserti tamamlamadan səhnəni tərk edib. Kuşun səhnədən enməsindən sonra bəzi tamaşaçılarla tədbir əməkdaşları arasında mübahisə yaranıb.

Qısa müddətdə böyüyən mübahisə əlbəyaxa davaya çevrilib. Konsert məkanında gərgin anlar yaşanarkən, hadisənin görüntüləri də sosial mediada yayılıb.

Telegramda izləyin