Son 1000 ilin ən güclü El-Ninosu: gələn il rekord istilər olacaq

BMT-nin məlumatına görə, El-Nino iqlim fenomeni "gözümüzün qarşısında güclənir".

Lent.az xəbər verir ki, son proqnozlara əsasən, bu hadisənin temperatur rekordlarını yeniləyəcəyi və ən azı son 1000 ilin ən güclü El-Nino hadisəsinə çevriləcəyi gözlənilir. Bu proses qlobal istiləşmə səbəbindən onsuz da sürətlə isinən atmosferdə əlavə istiliyin toplanmasına gətirib çıxaracaq.

Bu amillərin birləşməsi 2027-ci ilin bütün rekordları yeniləyərək müşahidələr tarixində ən isti il olacağı ehtimalını artırır. Fəsadların bütün dünyada hiss olunacağı bildirilir. Avstraliyada meşə yanğınları riskinin artmasından tutmuş Cənubi Amerikada daha güclü daşqınlara qədər müxtəlif ekstremal hava hadisələrinin intensivləşməsi gözlənilir.

Avqust ayında Ümumdünya Ərzaq Proqramı El-Ninonun təxminən 50 milyon insanın kəskin aclıqla üzləşməsinə səbəb ola biləcəyini açıqlayıb.

Fosil yanacaqlardan istifadə nəticəsində yaranan ətraf mühit çirklənməsinin səbəb olduğu iqlim böhranı artıq ekstremal hava şəraitini daha da ağırlaşdırır və insan ölümlərinə gətirib çıxarır.

Xatırladaq ki, El-Nino Sakit okean üzərində küləklərin istiqamətində və gücündə baş verən dəyişikliklərin okean suyunun temperaturunu yüksəltdiyi və böyük miqdarda istiliyin atmosferə ötürüldüyü təbii iqlim dövrüdür.

Telegramda izləyin