Dünyada İLK: Donuz böyrəyi ilə doqquz ay yaşadı, sonra insan orqanı köçürüldü - FOTO

ABŞ-də dünyada ilk dəfə olaraq bir pasiyent donuz böyrəyi ilə doqquz ay yaşayıb, ardınca isə ona uğurla insan orqanı köçürülüb.

Oxu.Az xəbər verir ki, bu barədə "The New York Times" qəzeti məlumat yayıb.

Məlumata görə, eksperimental əməliyyat zamanı 66 yaşı olan Tim Endryus diabet və hipertoniyadan əziyyət çəkirdi. Qan qrupunun nadir olması səbəbindən onun uyğun donor böyrəyi tapmaq şansı çox aşağı idi. 2025-ci ilin yanvarında o, genetik modifikasiya edilmiş donuz orqanının köçürülməsinə razılıq verib.

Donuz böyrəyi 271 gün fəaliyyət göstərərək Endryusun dializdən imtina etməsinə imkan yaradıb. Orqan qanı təmizləyib, əməliyyatdan sonrakı müddətdə xəstənin iştahası, eləcə də əzələ kütləsi bərpa olunub. Daha sonra damarlarda yaranan tromblar səbəbindən böyrək xaric edilib.

2026-cı ilin yanvarında Endryusa uyğun insan donorundan böyrək köçürülüb. Bu hadisə sübut edib ki, əvvəlcədən donuz orqanının transplantasiyası sonradan insan orqanının köçürülməsinə heç bir maneə yaratmır.

Ümumilikdə, FDA proqramı çərçivəsində beş pasiyentə "eGenesis" biotexnologiya şirkəti tərəfindən yaradılmış donuz böyrəkləri köçürülüb. Onlardan üçü bu orqanlarla səkkiz aydan çox yaşayıb. Həkimlər sözügedən texnologiyanı insan donoru gözləyən xəstələr üçün müvəqqəti "körpü" kimi qiymətləndirirlər.

Telegramda izləyin