Tramp: Demokratlar Ağ Evdəki bal zalını sökə bilməyəcək

ABŞ Prezidenti Donald Tramp bildirib ki, Demokratlar Partiyası istəsə belə, Ağ Evdə tikilən bal zalını sökə bilməyəcək.

"Report"un "New York Magazine"ə istinadən verdiyi məlumata görə, Tramp tikinti zamanı "ən möhkəm poladdan" və atom elektrik stansiyalarında istifadə olunan betondan yararlanıldığını qeyd edib.

"Bu, nüvə betonudur. Düşünürəm ki, onu dağıtmaq çox çətin olardı. O, nüvə hücumuna davam gətirmək üçün nəzərdə tutulub. Əmin deyiləm ki, onu sökmək mümkün olacaq", - deyə Tramp bildirib.

Ağ Evin adının açıqlanmadığı rəsmisinin sözlərinə görə, prezident bal zalının tikintisini öz irsinin bir hissəsi kimi nəzərdən keçirir və layihəni prezidentlik müddətinin sonuna qədər başa çatdırmağa çalışır. Mənbə qeyd edib ki, tikinti başa çatdıqdan sonra demokratların Trampın gördüyü işdən imtina etməsi çətin olacaq.

Bununla belə, Tramp özü də etiraf edib ki, vəzifədən getdikdən sonra ABŞ-da, ehtimal ki, onun şərəfinə heç kim abidə ucaltmayacaq. "Mən gedəndən sonra heç kim bunu etməyəcək", - deyə prezident bildirib.

Telegramda izləyin