Bülent Ersoyun estetik əməliyyatdan sonrakı görünüşü gündəm oldu: "Mənə abla deməyin"

Türkiyənin məşhur sənətçisi, "Diva" ləqəbli Bülent Ersoy bu dəfə estetik əməliyyatdan sonrakı görünüşü və diqqətçəkən açıqlaması ilə gündəmə gəlib.

Sonxeber.az xarici mediaya istinadla xəbər verir ki, Ersoyun Kuşadasında baş tutan konserti zamanı yaşanan hadisə də geniş müzakirələrə səbəb olmuşdu. Səhnəyə təxminən bir saat yarım gecikən sənətçiyə tamaşaçılardan biri "Saat neçə oldu, xəbəriniz varmı?" deyə müraciət edib. Bu sözlərə əsəbiləşən Bülent Ersoy tamaşaçıya sərt reaksiya göstərərək onu söyüşlərlə konsert məkanından uzaqlaşdırıb.

Hadisədən sonra açıqlama verən sənətçi səhhətində yaranan problemlə əlaqədar serum qəbul etdiyini bildirib. Ersoy sözlərinin hörmətsizlik olmadığını, ona qarşı səsləndirilən ifadəyə cavab verdiyini qeyd edib.

Bülent Ersoyun son dövrlərdəki dəyişikliklərindən biri də keçirdiyi estetik əməliyyat olub. İyul ayında estetik müdaxiləyə məruz qalan Diva yeni görünüşü barədə danışarkən diqqətçəkən ifadə işlədib.

"Mən üzümü lolita kimi etdirdim. Mənə abla deməyin", - deyə Bülent Ersoy bildirib.

Sənətçinin son görüntülərində estetik əməliyyatdan sonra üzündəki dəyişikliklər diqqətdən yayınmayıb. Bununla yanaşı, onun barmağındakı böyük ölçülü üzük də maraq doğurub.

Təxminən 12 karat olduğu bildirilən, çəhrayı sapfir və brilyantdan hazırlandığı ehtimal edilən üzük Bülent Ersoyun görünüşünün ən diqqətçəkən detallarından biri olub. Diva yeni imici ilə sosial mediada və Türkiyə mətbuatında yenidən gündəmə gəlib.

Telegramda izləyin