Ən xoş günləri faciəyə döndü: Toyda baş verən yanğın 22 nəfərin həyatına son qoydu - VİDEO

Konqo Demokratik Respublikasının paytaxtı Kinşasada toy mərasimi keçirilən zaman salonda yanğın baş verib.

Sonxeber.az xarici mediaya istinadla xəbər verir ki, alovların salonda sürətlə yayılması qonaqlar arasında böyük təşvişə səbəb olub. İnsanların binadan çıxmağa çalışdığı zaman izdiham yaranıb. Hadisə nəticəsində ilkin məlumata görə, 22 nəfər ölüb, çox sayda insan isə yaralanıb.

Yaralılar təcili tibbi yardım avtomobilləri ilə paytaxtdakı müxtəlif tibb müəssisələrinə aparılıb və müalicə altına alınıb.

Faciədən sonra yanğının başvermə səbəbinin müəyyənləşdirilməsi üçün araşdırma başladılıb. Hadisə yerində aidiyyəti qurumların əməkdaşları tərəfindən araşdırmalar davam etdirilir. Yanğının hansı səbəbdən baş verdiyi ilə bağlı isə hələlik dəqiq açıqlama verilməyib.

Faciədən sonra Konqo Demokratik Respublikasının Baş nazirinin müavini və daxili işlər naziri Jacquemain Shabani məsələyə müdaxilə edib.

Shabani ölkə üzrə bütün toy salonlarının, həmçinin ictimai tədbirlərin keçirildiyi məkanların təhlükəsizlik baxımından yoxlanılması barədə göstəriş verib.

Təhlükəsizlik standartlarına cavab vermədiyi müəyyən edilən məkanların isə dərhal bağlanması tapşırılıb.

Telegramda izləyin