Toyun səhəri qızılları götürüb qaçan gəlin tək cümləlik açıqlama verdi

Türkiyənin Muğla vilayətinin Milas rayonunda 3 gün 3 gecə davam edən toy mərasimindən sonra milyonlarla lirə dəyərində qızıl-zinət əşyaları ilə birlikdə yoxa çıxdığı iddia edilən Özbəkistan vətəndaşı Mamura Burkhonova saxlanılıb. 28 yaşlı gəlin polisə verdiyi ifadədə ona qarşı irəli sürülən ittihamları rədd edib.

Sonxeber.az xarici mediaya istinadla xəbər verir ki, Milasın Çomakdağ Kızılağaç məhəlləsində keçirilən təmtəraqlı toyun səhəri Burkhonovanın evdə olmadığı məlum olub. Bəy tərəfi toyda taxılan və təxminən 4 milyon lirə dəyərində olduğu bildirilən qızıl və zinət əşyalarının da yoxa çıxdığını bildirərək prokurorluğa müraciət edib.

Milas Respublika Baş Prokurorluğunun göstərişi ilə hərəkətə keçən polis əməkdaşları apardıqları araşdırma nəticəsində Mamura Burkhonovanı saxlayıb.

Polisdə ifadə verən Burkhonova hadisə ilə bağlı üzüntüsünü dilə gətirib və 4 milyon lirə dəyərində zinət əşyalarını götürdüyü barədə iddiaları qəbul etməyib.

Özbək gəlin yalnız özünə məxsus olduğunu bildirdiyi 20 ədəd çeyrek qızıl və 226 min türk lirəsi götürdüyünü deyib. O, toyda taxılan digər əsas zinət əşyalarının isə qayınatasının nəzarətində olduğunu iddia edib.

Burkhonova bu iddiasını təsdiqləmək üçün qayınatası ilə yazışmalarının olduğunu bildirib və həmin mesajlaşma qeydlərini istintaq işinə sübut kimi təqdim edib.

Polisin şübhəlinin saxlanıldığı ünvanda apardığı axtarış zamanı itkin düşdüyü bildirilən milyonlarla lirə dəyərində qızıl və zinət əşyaları aşkarlanmayıb.

Hazırda saxlanılan gəlinlə bağlı hüquqi prosedurlar davam edir. Hüquq-mühafizə orqanları təqdim edilən sübutlar və tərəflərin ifadələri əsasında araşdırmanı hərtərəfli şəkildə davam etdirir.

Telegramda izləyin