Zahir Nurəliyev ətrafında 50 min manatlıq müəmmalı olay - Ciddi suallar yaranır

Son günlər sosial şəbəkələrdə tanınmış müğənnilərdən birinin şəhid anası və qardaşı ilə əlbir olaraq iş adamından hədə-qorxu yolu ilə 50 min manat aldığı barədə məlumatlar yayılır.

İddialar hələlik rəsmi şəkildə təsdiqlənməsə də, məsələ ilə bağlı ortaya çıxan bəzi məqamlar ciddi suallar yaradır.

Məlumata görə, 50 min manatın alındığı iddia edilən şəxs "Qızıl-Açar" kanesdraşının rəhbəri Zahir Nurəliyevdir. Maraqlıdır ki, Zahir Nurəliyev məsələyə media qarşısında deyil, birbaşa adı hallanan müğənninin özünə verdiyi video açıqlama ilə münasibət bildirib.

Videoda Zahir Nurəliyevin kifayət qədər gərgin və sıxılmış danışması da diqqətdən yayınmayıb. Təbii ki, bu görüntü onun hər hansı təzyiq altında olduğunu sübut etmir. Lakin ortaya haqlı sual çıxır: Əgər belə bir hadisə baş verməyibsə, bu açıqlamanın məhz həmin şəxsə verilməsinin səbəbi nədir?

Digər diqqətçəkən məqam isə Zahir Nurəliyevin həmin şəxsləri uzun müddətdir tanıdığını bildirməsidir. Bu fakt da tərəflər arasındakı münasibətlərin araşdırılmasını zəruri edir.

Burada daha bir məsələ ortaya çıxır. Bəzi müğənnilərin nümayiş etdirdiyi dəbdəbəli həyat tərzi, bahalı avtomobillər və mülklər onların açıqlanan gəlirləri ilə nə dərəcədə uzlaşır?

Əlbəttə, bahalı həyat yaşamaq özü-özlüyündə qanunsuzluq deyil. Lakin gəlir və əmlak arasında ciddi uyğunsuzluq varsa, bunun mənbəyinin araşdırılması normaldır.

Biz media olaraq heç kimi günahkar elan etmirik. Bizim işimiz sual vermək və məsələni ictimailəşdirməkdir. Hadisənin həqiqət olub-olmamasına isə hüquq-mühafizə orqanları aydınlıq gətirməlidir.

Əgər 50 min manatlıq hədə-qorxu iddiası əsassızdırsa, bu da rəsmi araşdırma ilə ortaya qoyulmalıdır. Əks halda, məsələnin arxasında daha ciddi faktların olub-olmadığı araşdırılmalıdır.

Bir sözlə, 50 min manatlıq bu müəmmalı olayın üzərinə işıq salınmasına ehtiyac var./realazerbaycan.az

Telegramda izləyin