Şəxsin telefon nömrəsini icazəsiz şəkildə paylaşmaq hüquqi məsuliyyət yaradırmı? - AÇIQLAMA

Son dövrlərdə elan saytlarında və sosial şəbəkələrdə şəxslərin telefon nömrələrinin onların razılığı olmadan paylaşılması halları ilə bağlı narazılıqlar artır. Bəzən nömrələr müxtəlif elanlarda, bəzən isə şəxsi mübahisələr zamanı qarşı tərəfi narahat etmək məqsədilə yayımlanır.

Belə hallarda şəxsin şəxsi məlumatlarının qorunması və hüquqlarının hansı formada müdafiə oluna biləcəyi məsələsi gündəmə gəlir.

Bəs görəsən bir şəxsin telefon nömrəsini icazəsiz şəkildə elan saytında və ya sosial şəbəkədə paylaşmaq hüquqi məsuliyyət yaradırmı?

Hüquqşünas Xanım Yusifova bu barədə Sonxeber.az -a açıqlama verib:

"Şəxsin telefon nömrəsi onun razılığı olmadan yayımlandıqda bunun hüquqi nəticəsi konkret vəziyyətdən asılı olaraq qiymətləndirilir. Telefon nömrəsi fərdi məlumat hesab olunduğundan, onun toplanması, istifadəsi və yayılması zamanı qanunvericiliyin tələbləri nəzərə alınmalıdır. Xüsusilə nömrənin şəxsin razılığı olmadan və onun iradəsinə zidd şəkildə internetdə açıq yayımlanması hüquqların pozulması kimi qiymətləndirilə bilər.

Əgər nömrə qəsdən şəxsi narahat etmək, ona çoxsaylı zənglər gəlməsinə səbəb olmaq, nüfuzuna zərər vurmaq və ya digər məqsədlərlə paylaşılırsa, vəziyyətin xarakterindən asılı olaraq əlavə hüquqi məsuliyyət məsələsi də yarana bilər. Belə hallarda zərərçəkmiş şəxs paylaşımın ekran görüntüsünü, elan linkini və digər sübutları saxlamalı, materialın silinməsi ilə bağlı platformaya müraciət etməli, zərurət olduqda isə hüquq-mühafizə orqanlarına və ya məhkəməyə müraciət etməlidir.

Burada əsas məsələ nömrənin sadəcə paylaşılması deyil, onun hansı məqsədlə, hansı formada və şəxsin razılığı olmadan necə yayımlandığıdır. Buna görə də hər bir hal ayrıca hüquqi qiymətləndirilməlidir".

Telegramda izləyin