45 milyonluq toy edən bəy saxlanıldı - VİDEO

Sosial media fenomeni Çağla Öz ilə ötən bazar günü evlənən "Vanlı Kara Haydar" ləqəbli Mehmet Fatih Tançalan Türkiyənin Van vilayətində saxlanılıb.

Sonxeber.az xarici mediaya istinadla xəbər verir ki, Van Baş Prokurorluğu tərəfindən Tançalan barəsində sosial media platformalarında etdiyi paylaşımlarla bağlı Türkiyə Cəza Qanununun (TCK) 301-ci maddəsi çərçivəsində araşdırma başladılıb. Sözügedən maddə türk millətini, Türkiyə Cümhuriyyətini, dövlətin qurum və orqanlarını alçaltma cinayətini tənzimləyir.

Prokurorluğun göstərişi əsasında Tançalan Vanın Muradiyə rayonundakı evində Asayiş Şöbəsinin əməkdaşları tərəfindən saxlanılaraq polis bölməsinə aparılıb. Onun polis qeydiyyatında 25 müxtəlif hadisə ilə bağlı qeydiyyatının olduğu bildirilib.

Bununla yanaşı, Tançalanın sosial mediada yayılan görüntüləri, eləcə də toy mərasimində taxıldığı bildirilən və dəyərinin 45 milyon türk lirəsi olduğu qeyd edilən qızıllarla bağlı ayrıca maliyyə araşdırmasına başlanılıb.

Sözügedən əmlakın mənbəyinin müəyyənləşdirilməsi məqsədilə maliyyə araşdırması aparılır. Hüquq-mühafizə orqanlarının Maliyyə Cinayətlərinin Araşdırılması Şurasından (MASAK) da araşdırma tələb etdiyi bildirilib.

Tançalanın polis bölməsindəki prosedurlar başa çatdıqdan sonra Van Baş Prokurorluğuna istintaq üçün təqdim edilməsi gözlənilir.

İstintaq və maliyyə araşdırmasının hadisənin bütün aspektlərinin aydınlaşdırılması məqsədilə davam etdirildiyi bildirilib.

Telegramda izləyin