Evdə baş verən yanğın iki nəfərin canını aldı - VİDEO

Türkiyənin Elazığ vilayətinin Karakoçan rayonunda gecə saatlarında fərdi yaşayış evində baş verən yanğın iki nəfərin ölümü ilə nəticələnib.

Sonxeber.az xarici mediaya istinadla xəbər verir ki, hadisə Koçyiğitler kəndinə bağlı Ürünlü məhəlləsində baş verib. Hələlik müəyyən edilməyən səbəbdən gecə saatlarında başlayan yanğın qısa müddətdə bütün evi bürüyüb.

Kənd sakinlərinin məlumatı ilə hadisə yerinə Karakoçan Bələdiyyəsinin yanğınsöndürənləri, təcili tibbi yardım və jandarma əməkdaşları cəlb olunub. Yanğınsöndürənlər alovun ətrafdakı tikililərə keçməsinin qarşısını alaraq yanğını söndürüblər.

Lakin evə daxil olan əməkdaşlar acı mənzərə ilə qarşılaşıblar. Yanğın zamanı tüstüdən zəhərləndikləri müəyyən edilən Ağa Üykü və həyat yoldaşı Hayriye Üykünün həyatını itirdiyi məlum olub.

Yanğının söndürülməsindən sonra aparılan soyutma işləri nəticəsində evin tamamilə yararsız vəziyyətə düşdüyü bildirilib. Mərhumların meyitləri yarılma müayinəsi üçün xəstəxananın morquna aparılıb.

Hadisə ilə bağlı yanğının dəqiq başvermə səbəbinin müəyyənləşdirilməsi məqsədilə genişmiqyaslı araşdırma başladılıb.

Telegramda izləyin