PISA 2025 nəticələri şagirdlərin hazırlıq səviyyəsi ilə bağlı hansı mənzərəni ortaya qoyur? - AÇIQLAMA

PISA 2025 nəticələri Azərbaycan şagirdlərinin oxu, riyaziyyat və təbiət elmləri üzrə bilik və bacarıqlarının real həyatda tətbiqi baxımından mövcud vəziyyəti qiymətləndirmək üçün mühüm göstəricidir. PISA məhz 15 yaşlı şagirdlərin bu sahələrdə biliklərini tətbiq etmək bacarığını ölçür.

Bəs, PISA 2025 nəticələri Azərbaycan şagirdlərinin hazırlıq səviyyəsi ilə bağlı hansı mənzərəni ortaya qoyur, əvvəlki nəticələrlə müqayisədə hansı dəyişikliklər müşahidə olunur və göstəricilərin yaxşılaşdırılması üçün təhsil sistemində əsasən hansı istiqamətlərə diqqət yetirilməlidir?

Mövzu ilə bağlı Sonxeber.az-a açıqlama verən Milli Məclisin deputatı Ceyhun Məmmədov bildirib ki, bu gün keçirilən brifinqdə Elm və Təhsil Nazirliyi bu məsələyə geniş və ətraflı şəkildə toxunaraq öz mövqeyini açıqladı.

"Ümumilikdə, prosesin təhlili göstərir ki, bir sıra istiqamətlər üzrə ciddi səylərə ehtiyac var. Hazırkı vəziyyət bizi qane edə bilməz. Bəzi istiqamətlərdə müsbət dəyişikliklər olsa da, digər sahələrdə müəyyən mənfi göstəricilər mövcuddur. Buna görə də əsas məqsəd mövcud çatışmazlıqları müəyyənləşdirərək onların aradan qaldırılması istiqamətində daha ciddi iş aparmaq olmalıdır".

Deputat bildirib ki, Elm və Təhsil Nazirliyinin bu gün açıqladığı məlumatlar təhsil sahəsində narahatlıq doğuran bir sıra məsələlərin olduğunu göstərir:

"Hesab edirəm ki, yalnız rəqəmləri açıqlamaq kifayət deyil. Riyaziyyat üzrə nəticələr, qızlar və oğlanlar arasındakı fərqlər, təhsildən yayınma, şagirdlərin qavrama səviyyəsi və digər göstəricilər ətraflı şəkildə təhlil olunmalıdır. Əsas məsələ bu nəticələrin səbəblərini müəyyənləşdirmək və aşkar olunan problemlərin aradan qaldırılması üçün konkret addımlar atmaqdır".

Röyalə Xəyal

Telegramda izləyin