Ət idxalından asılılığı azaltmaq üçün Azərbaycanda hansı addımlar atılmalıdır? - AÇIQLAMA

Ət idxalından asılılığın azaldılması üçün yerli heyvandarlığın inkişafı, yem bazasının gücləndirilməsi və fermerlərin maliyyə imkanlarının artırılması əsas istiqamətlərdən hesab olunur. 2026-2030-cu illər üzrə dövlət proqramında da heyvandarlıqda yem təminatında idxaldan asılılığın azaldılması və yerli yem istehsalının təşviqi prioritet kimi müəyyənləşdirilib.

Bəs, Azərbaycanda ət istehsalını artırmaq və idxaldan asılılığı azaltmaq üçün hansı addımlar atılmalıdır, yem bazasının gücləndirilməsi və fermerlərə dövlət dəstəyinin artırılması daxili tələbatın ödənilməsinə nə dərəcədə kömək edə bilər?
Mövzu ilə bağlı Sonxeber.az-a açıqlama verən iqtisadçı ekspert Natiq Cəfərli bildirib ki, Azərbaycan hökuməti və Kənd Təsərrüfatı Nazirliyi ət istehsalı ilə bağlı iri və xırda buynuzlu mal-qaranın sayının kəskin azalması problemini görür və bununla bağlı müəyyən addımlar atmağa çalışır.

"Son günlər iri və xırda buynuzlu mal-qara ilə bağlı müəyyən təşviq proqramlarının qəbul edilməsi də bu istiqamətdə atılan addımlardandır. Ümumilikdə, təşviq proqramlarının tətbiqi düzgün istiqamətdir. Lakin bu proqramlar yalnız iri fermer təsərrüfatlarını deyil, kənddə fəaliyyət göstərən kiçik təsərrüfatları, hətta 5 qoyunu və ya 2 inəyi olan fermerləri də əhatə etməlidir. Təəssüf ki, hazırkı təşviq proqramlarının əsasən iri fermer təsərrüfatları üçün nəzərdə tutulması düzgün yanaşma deyil".

Ekspert bildirib ki, tarixi təcrübə də göstərir ki, kiçik, ailə və fermer təsərrüfatları ölkədə maldarlığın inkişafında və ət istehsalının artırılmasında mühüm rol oynayıb:

"Buna görə də yeni təşviq proqramlarının qəbul edilməsini müsbət qiymətləndirirəm, lakin bundan sonrakı mərhələdə kiçik kəndli və ailə təsərrüfatlarının dəstəklənməsi üçün də əlavə addımlar atılmalıdır. Bu istiqamətdə yem bazasının gücləndirilməsi, yemin maya dəyərinin və qiymətinin aşağı salınması üçün tədbirlərin görülməsi, heyvan xəstəlikləri ilə mübarizədə dövlət tərəfindən pulsuz dəstəyin göstərilməsi və digər mexanizmlərin tətbiqi vacibdir. Bu cür tədbirlər həyata keçirilməklə ölkədə ət istehsalının artırılmasına nail olmaq mümkündür".

Röyalə Xəyal

Telegramda izləyin