Qusarda toyu olan Amerikalı gəlinin qayınanası: "Oğlum dedi ki..."

Vaqifin ailəsi Bakı şəhərində yaşasa da, ailə cütlüyə nənənin yanında toy edib

Amerikalı qızla evlənən Vaqif Babayevin anası İstiPress-in şimal bürosuna amerikalı gəlinləri barədə danışıb.

"Oğlum hələ 8-ci sinifdə oxuyan vaxtdan deyib ki, mənim ailə qurmaq işimə qarışma" Məhəbbət sərhəd tanımır, deyirlər. Həqiqətən belədir. Bu günlərdə amerikalı qızla ailə qurmuş qusarlı Vaqif Babayev anası Bikə xanımla söhbətdən sonra bu qənaət məndə daha da gücləndi. Ana deyir ki, oğlumun ailə məsələsinə, özü dediyi kimi, qarışmamışam, hələ uşaq vaxtdan onun mənə dediyi sözləri unutmamışam. Oğlumun qayğısına ana kimi hər an, həmişə qalsam da evlənmək xəbərini həmişə ondan gözləmişəm. Ta o vaxta qədər ki..."

Bu yerdə Azərbaycandan getmiş, milliyyətcə ləzgi Vaqifin okeanın o tayından olan Cessika ilə tanişlığından tanışaq. Cütlük harda tanış olub? Onlar heç də Amerikada deyil, od-alov yağan İraqın Mosuldan təxminən 20 km aralıda yerləşən Erbil şəhərində İhsan Doğramacının təşəbbüsü ilə açılan Beynəlxalq məktəbdə taniş olublar. Köməyə ehtiyacı olan iraqlı uşaqlara dərs demək üçün Azərbaycandan Konservatoriyanın skripka şöbəsini bitirib müqavilə ilə həmin məktəbə işləməyə gedən Vaqif burada Amerikan qızı ilə tanış olub. Burada ibtidai sinif müəllimi işləyən Cessika ilə tanış olub. 34 yaşında evlənməyə qərar verən Vaqifin amerikalı sevgilisi ona razılıq verər-verməz Azərbaycanın, Qusarın milli adət-ənənələrini öyrənməyə başlayıb, kəmərdən tutmuş hər milli paltara, əşyayadək sifarış verib, musiqi alətlərimizi öyrənməyə, nişan və toyla bağlı butün adət-ənənələrə uyğun bütün məlumatları tam öyrənib. Cütlüyün Bakıda keçirilən nişanından əldə etdiyim 2 şəkil həqiqətən millilikdən xəbər verir. Milli paltar geymiş cütlük bütün qədim məişət əşyalarının əhatəsində qaval və tarla görüntülənib. Digər şəkildə isə Amerika və Azərbaycanın sevgi yaşadıcılarını bizim Müqəddəs Qurani Kərimimizə baxdıqları yerdə görürük. Cessika oxuya bilməsə də Vaqif bu müqəddəs kitabımız barədə ona məlumat verirmiş. Qaynana Bikə xanım gəlininin hətta toya 2 sandıq sifarış verdiyini də dedi. Axtarsaq, indi gəlin köçən bəzi qızlarımız sandıq aparmağa elə həvəs göstərmirlər. Amma, baxın, Azərbaycan vətəndaşına ərə gələn əcnəbi qız , görün, adətimizi necə öyrənib. Belə görünür ki, o Vaqifi bütün adətlərimizlə birgə qəbul edib.

Qayıdaq beynəlmiləl cütlüyün toyuna. Nişandan sonra Cessikanın qız toyu ABŞ-da olub. Həmin toyda bəy tərəfdən bacısı Vəfa iştirak edib. Azərbaycanda isə toy Bakıda əsas hazırlıqlardan sonra Vaqifin ana nənəsi Alma Zahirovanın yaşadığı Qusarın Kirik kəndində keçirilib. Bu toy da əsasən milli çalarlar üstündə təşkil edilib. Vaqiflə Cessikanın neçə ilin rəqqası kimi Azərbaycan mahnısının sədaları altında həvəslə rəqs etmələri də sosial şəbəkələrdə maraqla qarşılanıb.

Vaqifin ailəsi Bakı şəhərində yaşasa da, ailə cütlüyə nənənin yanında toy edib. 81 yaşlı ləzgi Alma nənə axır ki, subaylığın daşını atan nəvəsinə amerikalı qızla xoşbəxt olmağı arzulayaraq onlara xeyir-dua verib.

Bikə Zahirova deyir ki, oğlunun seçiminə hörmətlə yanaşıb və tanıdığı müddətdə Cessikanı çox bəyənib. Amerikalı gəlin Azərbaycandakı toya anası Meri ilə gəlibmiş. Bikə xanım Cessikanın Azərbaycan və ləzgi dillərini öyrənməyə çalışdığından da danışdı. Amerikalı gəlinin qaynanası Bikə xanım söylədi ki, Vaqifgilə kəndimizdə torpaq sahəsi də almışıq. Ev tikmək istəyirlər. Çünki,Cessika Azərbaycanı çox sevir. Deyir ki, imkan olan kimi, gəlib burada yaşayacağıq. İnanırıq buna. Kim bilir, nə vaxtsa amerikan Cessika Azərbaycanın milli mədəniyyətinin, musiqisinin tədqiqatı ilə məşğul olacaq?Qaynananın dedikləri - onun musiqimizə, mədəniyyətimizə sevgisi bunu sübut edir. Xoşbəxt olsunlar. Amerika-Azərbaycan dostluğundan yaranan xoşbəxt ailə olsunlar!

Əldə etdiyimiz videolarda Qusarın Amerikan gəlninin bəylə Üzeyir Hacıbəyovin "O olmasın, bu olsun" operettasını xüsusi həvəs və coşqu ilə rəqs etməsinin şahidi oluruq. Gəlinin anası Merinin də yerli sakinlərlə və təzə qohumlarla rəqs etməyi
də diqqətdən yayınmır.

Telegramda izləyin

instagramda izləyin