Azərbaycanda 1000-dən çox körpə...

"Ötən il respublika üzrə 1000-dən çox doğuş evdə həyata keçirilib".

Sonxeber.az bildirir ki, bu barədə AzVision.az-a Səhiyyə Nazirliyi Doğuşayardım Komissiyasının sədri, Respublika Perinatal Mərkəzin direktoru Sevinc Məmmədova deyib. Onun sözlərinə görə, belə doğuşların əksəriyyəti ucqar dağ kəndlərində həyata keçirilir.

"Respublika üzrə 170 min doğuş həyata keçirilirsə, evdə doğuşların sayı 1000-dən yuxarı olmur. Bunlara daha çox ucqar dağ kəndlərində rast gəlinir. Həmin ərazidə hamilə qadınların həkimlərə gəlib çatmaq baxımından, texniki cəhətdən problemlər yarandığı üçün doğuşlar evdə həyata keçirilir".

S.Məmmədova evdə doğuşların ana və körpəsi üçün riskli olduğunu vurğulayıb: "Təəssüf ki, əhali bunu başa düşmür. El arasında "mamaça" kimi tanınan şəxslərə müraciət edirlər. İş işdən keçəndən, doğuş fəsadlaşandan sonra qadını maşına qoyub müəssisəyə gətirirlər. Evdə doğuş cəhdi isə gizlədilir".

Komissiya sədrinin sözlərinə görə, keçən il evdə doğuş üzrə ana ölümü qeydə alınmayıb: "Onlar bilirlər ki, evə şəraitində doğuş həyata keçirən dırnaqarası mamaçalar baş verəcək ölümə görə cəzalanacaqlar. Doğuş fəsadlaşanda hamilə qadını maşına qoyub xəstəxanalara çatdırırlar, həkimlər isə əksər vaxtlarda anaları vəziyyətdən çıxara bilirlər. Körpələrin həyatını xilas edə bilməsələlər də, analara yardım edirlər".

Qeyd edək ki, 2016-ci il Bakı Şəhər Təcili və Təxirəsalınmaz Tibbi Yardım Stansiyasına evdə doğuşla bağlı 68 müraciət daxil olub. 2015-ci ildə isə bu rəqəm 100 olub.

Telegramda izləyin

instagramda izləyin