"Demokratlar bu seçkilərə Trampın siyasətinə qarşı ictimai narazılığı siyasi nəticəyə çevirmək fürsəti kimi yanaşırlar" - BƏHRUZ QULİYEV

"ABŞ-da noyabrın 3-də keçiriləcək aralıq seçkilər təkcə Konqresdəki siyasi qüvvələr nisbətini müəyyənləşdirməyəcək, həm də Donald Tramp administrasiyasının növbəti iki ildə hansı imkanlarla fəaliyyət göstərəcəyinə ciddi təsir edəcək.

Demokratlar bu seçkilərə Trampın siyasətinə qarşı ictimai narazılığı siyasi nəticəyə çevirmək fürsəti kimi yanaşırlar. Onların strategiyasında bir neçə əsas istiqamət diqqət çəkir. İqtisadi problemləri ön plana çıxarmaq, İran müharibəsi və xarici siyasət qərarlarını müzakirəyə çıxarmaq, eyni zamanda administrasiyanın fəaliyyətinə Konqres nəzarətini gücləndirmək." Bu fikirləri Səs qəzetinin baş redaktoru, siyasi ekspert Bəhruz Quliyev Sonxeber.az-a açıqlamasında deyib.

Ekspert qeyd edib ki, ABŞ - da yanacağın qiyməti, inflyasiya, ərzaq və mənzil xərcləri seçicilərin gündəlik həyatına birbaşa təsir göstərir. Demokratlar çalışırlar ki, bu problemlərə görə siyasi məsuliyyət Tramp administrasiyasının üzərinə düşsün. İran istiqamətindəki hərbi əməliyyatların xərcləri və enerji bazarına təsiri də bu arqumentlərin bir hissəsidir.
Eyni zamanda, Demokratlar Nümayəndələr Palatasında üstünlük qazansalar, administrasiyanın qərarları ilə bağlı dinləmələr keçirə, sənədlər tələb edə və müxtəlif araşdırmalar başlada bilərlər. Senatda çoxluq əldə etmək isə prezidentin təyinatlarına münasibətdə onlara əlavə səlahiyyətlər verər. Bununla belə, prezidentin xarici siyasət qərarlarını tam dayandırmaq üçün Konqresin imkanları məhduddur.

Digər ən vacib məsələ odur ki, Demokratlar yalnız ənənəvi tərəfdarlarını səfərbər etməyə deyil, müstəqil seçicilərin və iqtisadi vəziyyətdən narazı vətəndaşların dəstəyini qazanmağa da çalışırlar. Respublikaçılar isə öz növbəsində Trampın tərəfdarlarını səfərbər edir və administrasiyanın siyasətini müdafiə edirlər.

"Hesab edirəm ki, bu seçkilərin nəticələrini yalnız Trampın şəxsi reytinqi ilə ölçmək düzgün olmaz. Burada iqtisadi vəziyyət, regional seçki rəqabəti, namizədlərin nüfuzu və seçici fəallığı da həlledici əhəmiyyət daşıyır.

Əgər Demokratlar Nümayəndələr Palatasında çoxluğu əldə etsələr, Tramp administrasiyasına qarşı siyasi və institusional təzyiq arta bilər. Lakin bu, avtomatik olaraq impiçment və ya prezidentin vəzifədən kənarlaşdırılması demək deyil. Əsas nəticə Ağ Evlə Konqres arasında daha sərt siyasi mübarizənin başlanması ola bilər.

Beləliklə, noyabr seçkiləri ABŞ-da yalnız partiyalararası rəqabət deyil, həm də Trampın daxili və xarici siyasət kursuna ictimai-siyasi münasibətin mühüm göstəricisi olacaq." - deyə, B.Quliyev əlavə edib.

Müəllif: İlkin Məmmədkərimov

Telegramda izləyin