Yəməndə raket hücumu: azı 20 hərbiçi öldürülüb

Yəmənin cənubundakı Şəbva vilayətində hökumət qüvvələrinə məxsus hərbi düşərgəyə ballistik raketlərlə hücum edilib. Nəticədə azı 20 hərbiçi həlak olub, 20-dən çox hərbiçi yaralanıb.

Sonxeber.az Associated Press-ə istinadən xəbər verir ki, hücum oktyabrın 19-da Əl-Ələm hərbi düşərgəsinə qarşı həyata keçirilib. Yəmən hökumətinin hərbi rəsmiləri hücumun husilər tərəfindən təşkil edildiyini bildiriblər.

Yəmən ordusunun sözçüsü, polkovnik Macid əl-Nəzili husilərin polis və təhlükəsizlik qüvvələrinin təlim mərkəzinə üç ballistik raket atdığını təsdiqləyib. O, itkilərin sayı ilə bağlı əlavə məlumat verməyib.

Həlak olanların əksəriyyətinin yeni yaradılmış Çevik Müdaxilə qüvvələrinin hərbçiləri olduğu bildirilir. Həmin qüvvələr bölgənin müdafiəsi üçün formalaşdırılıb.

Hücum Yəməndə hökumət qüvvələri ilə husilər arasında döyüşlərin yenidən intensivləşdiyi bir vaxta təsadüf edir. Tərəflər arasında 2022-ci ildə əldə olunmuş atəşkəs razılaşması son aylarda baş verən toqquşmalar nəticəsində faktiki olaraq pozulub.

Bundan əvvəl, oktyabrın 18-də Səudiyyə Ərəbistanının rəhbərlik etdiyi koalisiyanın zərbəsi nəticəsində Yəmənin husilərin nəzarətində olan Səada vilayətində azı 9 nəfərin öldüyü barədə məlumat yayılıb. Ölənlər arasında qadın və uşaqların da olduğu bildirilir.

Müəllif: İlkin Məmmədkərimov

Telegramda izləyin