"AKP rəsmiləri, millət vəkilləri dövlətimizi hədəfə alıblar" - millət vəkili Müşfiq Cəfərov

"Türkiyədə bəzi dairələrin Azərbaycana qarşı həftələrdir davam etdirdiyi qarayaxma kampaniyası səngimək yerinə daha kəskin xarakter alır. AKP rəsmiləri, millət vəkilləri dövlətimizi hədəfə alıblar. Üstəlik, AKP Azərbaycana qarşı radikal çıxışlar edənlərə də səsini çıxarmır. Amma, Türkiyənin çətin günlərində, AKP hakimiyyətinə qarşı çevriliş cəhdi olanda Azərbaycan dövləti tamamilə fərqli, əsl qardaşlıq mövqeyi nümayiş etdirmişdi". Bu sözləri Sonxeber.az-a açıqlamasında millət vəkili Müşfiq Cəfərov bildirib.
Onun sözlərinə görə, Azərbaycan dövləti hər zaman Türkiyə dövlətçiliyinə qarşı yönələn təxribatçı addıma qarşı prinsipial mövqe nümayiş etdirib: "Ancaq bu gün Azərbaycana qarşı yönələn ideoloji hücumlar zamanı Türkiyədən eyni prinsipiallığı görmürük. Azərbaycanın davamlı siyasi inkişaf kursu, müstəqilliyini möhkəmləndirməsi və milli kimlik məsələlərində öz yolunu müəyyənləşdirməsi xarici ideoloji dairələrin təsir imkanlarını məhdudlaşdırır. Bu amil ölkəmizə qarşı dini şüarlarla pərdələnən təsirləri minimuma endirsə də, təzyiq cəhdləri hələ də qalır.

Azərbaycan müxtəlif dövlətlərdən ölkəmizə ayaq açan təriqətlərin yaratdığı problemləri daha əvvəl də yaşayıb. Xüsusilə Azərbaycanda "nurçu" şəbəkənin formalaşmasına maddi, siyasi dəstək göstərildiyi zamanları misal göstərə bilərik. Hətta ölkəmizdə "Nurçu" şəbəkəni təmizləmək üçün uzun müddət mübarizə aparıldı".

Müəllif: İlkin Məmmədkərimov

Telegramda izləyin