"Binalar arasında məsafənin azaldılması insan həyatı hesabına aparıla bilməz" - Muxtar Ərturan

Şəhərsalma zamanı binalar arasındakı məsafənin qorunması yalnız ərazidən səmərəli istifadə deyil, həm də sakinlərin təhlükəsizliyi baxımından mühüm əhəmiyyət daşıyır. Lakin yeni tikililərdə binaların bir-birinə həddindən artıq yaxın yerləşdirilməsi yanğın zamanı alovun qonşu binaya keçməsi riskindən tutmuş, yanğınsöndürən texnikanın hadisə yerinə yaxınlaşmasına qədər bir sıra təhlükəsizlik məsələlərini gündəmə gətirir.

Bəs binalar arasındakı məsafə hansı tələblərə uyğun müəyyənləşdirilməlidir və tikinti zamanı bu normalara nə dərəcədə əməl olunur?
Mövzu ilə bağlı şəhərsalma və inşaat məsələləri üzrə ekspert, novator memar Muxtar Ərturan Sonxeber.az-a açıqlamasında bildirdi ki, inşaat məsələləri üzrə ekspert olaraq bildirirəm ki, Bakıda binaların bir-birinə həddindən artıq yaxın tikilməsi ciddi şəhərsalma və yanğın təhlükəsizliyi riskləri yaradır. Yanğın zamanı alov yalnız birbaşa təmasla deyil, istilik şüalanması, yanan hissəciklər və fasad materialları vasitəsilə də qonşu binaya yayıla bilər. Üstəlik, binalar arasında məsafə azaldıqca yanğınsöndürmə texnikasının hərəkəti və insanların təxliyəsi çətinləşir.

Azərbaycanın tikinti normalarında yaşayış və ictimai binalar arasında yanğın əleyhinə məsafələr odadavamlılıq dərəcəsindən asılı olaraq 6, 8, 10 və 15 metr kimi müəyyən edilir. Hündür və xüsusi təyinatlı binalarda isə əlavə, daha sərt tələblər tətbiq oluna bilər. Bir memar kimi hesab edirəm ki, əsas problem yalnız binaların yaxınlığı deyil, həmin yaxınlığın mühəndis hesablamaları və təhlükəsizlik tədbirləri ilə əsaslandırılıb-əsaslandırılmamasıdır. Qanunvericilik müəyyən şərtlərlə bitişik tikintiyə imkan versə də, bu halda odadavamlı konstruksiyalar və yanğının yayılmasının qarşısını alan həllər təmin edilməlidir.

"VR Standartları 2026" metodikasının insan mərkəzli təhlükəsizlik yanaşması baxımından da yaşayış mühitinin keyfiyyəti yalnız mənzilin daxilində deyil, qonşu tikililərlə qarşılıqlı təhlükəsizlik şəraitində qiymətləndirilməlidir.

Mənim mövqeyim qətidir: investorun əlavə kvadratmetr qazanmaq marağı insanların təhlükəsizliyindən üstün tutula bilməz.
Binalar arasındakı məsafə boş torpaq deyil, yanğın zamanı insan həyatını qoruyan təhlükəsizlik zonasıdır.

Normativ əsas: Azərbaycan Respublikasının Şəhərsalma və Tikinti Məcəlləsinin 60 və 69-cu maddələri, həmçinin yanğına qarşı ara məsafələri müəyyən edən dövlət şəhərsalma normaları.

Müəllif: İlkin Məmmədkərimov

Telegramda izləyin