Leysan yağışları ilə bağlı narahatlıq: "Yağış sularının idarə olunması üçün daha çox iş görülməlidir"

İstanbulda müşahidə olunan güclü leysan yağışları sel, daşqın və şəhərdaxili su basmaları riskini yenidən gündəmə gətirib. Azərbaycanda da intensiv yağıntılar çaylarda suyun səviyyəsinin artmasına, dağlıq ərazilərdə sel hadisələrinə və şəhərlərdə infrastrukturla bağlı problemlərə səbəb ola bilər. Belə hallarda qabaqlayıcı tədbirlərin görülməsi və əhalinin vaxtında xəbərdar edilməsi mümkün fəsadların azaldılması baxımından mühüm əhəmiyyət daşıyır.

Bəs, İstanbulda müşahidə olunan leysan yağışları fonunda Azərbaycanda hansı hava şəraiti gözlənilir, intensiv yağıntılar hansı risklər yarada bilər və sel, daşqın və şəhərlərdə su basmalarının qarşısını almaq üçün hansı tədbirlər görülməlidir? İqlim dəyişikliyi bu cür ekstremal hava hadisələrinin tezliyinə və şiddətinə necə təsir edir?
Mövzu ilə bağlı Sonxeber.az-a açıqlama verən ekoloq Sadiq Həsənov bildirib ki, iqlim dəyişikliyi atmosfer yağıntılarının qısa müddətdə və leysan xarakterli şəkildə düşməsinə səbəb olur.

"İstanbulda son 10 ildə müşahidə edilməyən intensiv yağıntıların baş verməsi göstərir ki, bu cür hadisələr istənilən ölkədə yaşana bilər. Azərbaycanda iqlimi və yağıntıları müəyyən edən siklonlar cənubdan, Aralıq dənizi istiqamətindən Türkiyə və İran üzərindən ölkəmizə daxil olur. Azərbaycanda da bu cür güclü yağışlar yaz aylarında baş verib və ciddi fəsadlarla müşayiət olunub".

Ekspert bildirib ki, hazırda yağıntılarla bağlı tam dəqiq proqnoz vermək mümkün olmasa da, Azərbaycanda da belə hadisələrin baş vermə ehtimalı yüksəkdir:

"Payız mövsümündə intensiv yağışlar gözlənilir. Havanın isti və quraq keçməsi də bu cür yağıntıların baş vermə ehtimalını artıran amillərdən biridir. Düşünürəm ki, güclü yağışların fəsadlarının qarşısını almaq üçün yollardakı drenaj sistemləri yoxlanılmalı, yağış sularının axdığı ərazilərə yenidən baxış keçirilməlidir. Çünki yolların kənarlarında yağış sularının axıdılması üçün nəzərdə tutulan drenaj sistemlərinin bir çoxu yol təmiri və yenilənməsi zamanı ləğv edilib. Yağış sularının idarə olunması istiqamətində daha çox iş görülməlidir. Təəssüf ki, bu sahədə tədbirlər, demək olar ki, çox ləng həyata keçirilir".

Röyalə Xəyal

Telegramda izləyin