Ərzaq qiymətləri yenə artır: Qışda vətəndaşları nə gözləyir? - İQTİSADÇIDAN AÇIQLAMA

Ərzaq məhsullarının qiymətlərində artım davam edir. Dövlət Statistika Komitəsinin məlumatına görə, 2026-cı ilin yanvar-sentyabr aylarında ərzaq məhsulları, alkoqollu içkilər və tütün məmulatları üzrə qiymətlər ötən ilin eyni dövrü ilə müqayisədə 6,9 faiz artıb. Sentyabrda isə bu məhsullar üzrə qiymət artımı əvvəlki ayla müqayisədə 1,4 faiz təşkil edib. Ən çox bahalaşan məhsullar arasında tərəvəz, yumurta və ət məhsulları yer alıb.

Qış mövsümünün yaxınlaşması ilə ərzaq bazarında qiymətlərin hansı istiqamətdə dəyişəcəyi də maraq doğurur. Bəs qiymət artımına hansı amillər təsir edir və qarşıdakı aylarda hansı ərzaq məhsullarının bahalaşması ehtimalı daha yüksəkdir?
Mövzu ilə bağlı Liberal İqtisadçılar Mərkəzinin sədri Akif Nəsirli Sonxeber.az-a açıqlamasında bildirdi ki, ərzaq qiymətlərində son artım bir neçə amiliələ bağlıdır. Birincisi, qlobal bazarda ərzaq və xammal qiymətlərinin artması Azərbaycana idxal olunan məhsulların maya dəyərini yüksəldir. Xüsusilə bitki yağları, taxıl və süd məhsullarında dünya qiymətlərində bahalaşma müşahidə olunur. İkincisi, logistika və daşıma xərclərinin artması, həm xarici idxalda, həm də daxili bazarda paylama xərclərini çoxaldır. Üçüncüsü, manatın alıcılıq qabiliyyəti ilə yanaşı mövsümi amil də var, sentyabrda məhsul yığımı dövrü başa çatdıqca təzə məhsul təklifi azalır və bu da qiymətlərə təzyiq yaradır.

Qış aylarına doğru ən yüksək bahalaşma riski istixana tərəvəzlərində, yəni pomidor, xiyar, bibər, göyərti kimi məhsullardadır, çünki onların istehsal xərci qışda isitmə və enerji səbəbindən iki dəfəyə qədər artır. Bundan əlavə, idxaldan asılı olan məhsullar, süd və ət məhsulları, yumurta və kərə yağı kimi saxlanma xərci yüksək olan məhsullarda da artım gözlənilir. Ət məhsullarında yem qiymətlərinin artması maya dəyərini birbaşa yuxarı çəkir.

Müəllif: İlkin Məmmədkərimov

Telegramda izləyin