Hindistanın ən böyük bankında 3 897 müştərinin məlumatları oğurlanıb

Hindistan Dövlət Bankı (SBI) kiberhücum nəticəsində 3 897 müştəriyə aid fərdi məlumatların qaranlıq internetdə (darknet) yayıldığını açıqlayıb.
Bizimyol.info xəbər verir ki, "Reuters" agentliyinin oktyabrın 21-də yaydığı məlumata görə, ilkin araşdırma zamanı müştərilərin adlarının, mobil telefon nömrələrinin, doğum tarixlərinin, elektron poçt və yaşayış ünvanlarının, eləcə də müştəri identifikatorlarının və kredit məlumatlarının oğurlandığı müəyyən edilib.

Hadisənin miqyasını və səbəblərini araşdırmaq üçün bank müstəqil kibertəhlükəsizlik şirkətini cəlb edib. SBI insidentin əsas əməliyyatlara, maliyyə göstəricilərinə və fəaliyyətin davamlılığına ciddi təsir göstərməsinin gözlənilmədiyini bildirib.

Məlumat sızması Hindistanda maliyyə sektoruna qarşı kiberhücum təhlükəsinin artdığı bir dövrdə baş verib. Ölkənin bank tənzimləyicisi son illərdə maliyyə qurumlarını kibertəhlükəsizlik sistemlərini gücləndirməyə çağırır.

Telegramda izləyin