The Guardian: "Husilərin hücumları fonunda ABŞ diplomatlarına Səudiyyə Ərəbistanını tərk etmək göstərişi verilib"

Səudiyyə Ərəbistanında husilərin demək olar ki, hər gün həyata keçirdiyi hücumlar fonunda ABŞ Dövlət Departamenti bəzi diplomatlara və ABŞ hökuməti əməkdaşlarının ailə üzvlərinə ölkəni tərk etmək göstərişi verib. Qərar mülki hava limanlarına və digər mühüm infrastruktura edilən hücumlarla əlaqələndirilib.

Hava limanlarına və neft obyektlərinə hücumlar

Sonxeber.az The Guardian-a istinadən xəbər verir ki, Səudiyyə Ərəbistanının mülki aviasiya qurumu cümə axşamı Dammamdakı Kral Fəhd Beynəlxalq Hava Limanına gecə hücumları nəticəsində iki nəfərin öldüyünü açıqlayıb. Daha səkkiz nəfərin yaralandığı, hava limanına maddi ziyan dəydiyi bildirilib. Uçuşları izləyən Flightradar24 xidməti bəzi təyyarələrin başqa istiqamətlərə yönləndirildiyini qeyd edib.

Bundan başqa, ölkənin cənub-şərqində neft obyektini hədəf alan dronun zərərsizləşdirilməsindən sonra düşən qalıqlar iki nəfərin ölümünə və daha iki nəfərin yaralanmasına səbəb olub. Hər iki hücuma görə məsuliyyəti dərhal heç bir tərəf üzərinə götürməyib.

ABŞ İranla müharibəni yenidən başlada bilərmi?

Diplomatların çıxarılması ABŞ-ın İrana qarşı hərbi əməliyyatları yenidən başlada biləcəyi barədə xəbərlərin yayıldığı vaxta təsadüf edir. The New York Times qəzetinin məlumatına görə, Donald Tramp administrasiyasına İrana qarşı yeni zərbələr endirilməsi ilə bağlı planlar təqdim olunub.

Bununla belə, ABŞ Dövlət Departamenti Səudiyyə Ərəbistanından əməkdaşların çıxarılması qərarının yalnız bu ölkəyə aid olduğunu vurğulayıb. Departamentin nümayəndəsi digər Körfəz ölkələrindən diplomatların çıxarılması barədə yayılan məlumatları qeyri-dəqiq adlandırıb.

Tramp daha əvvəl noyabrın 3-də keçiriləcək aralıq seçkilərindən əvvəl İranla müharibəni yenidən başlatmaq niyyətində olmadığını bildirmişdi. Buna görə də diplomatların çıxarılması özlüyündə yeni hərbi əməliyyatların başlanacağına dair təsdiq deyil.

Müəllif: İlkin Məmmədkərimov

Telegramda izləyin