Financial Times: "Politico və The Telegraph-ın sahibi TikTok-un Avropa bölməsini almaq istəyir"

Almaniyanın media şirkəti Axel Springer-in rəhbəri Matias Döpfner TikTok-un Avropa əməliyyatlarında pay əldə etmək təklifi ilə çıxış edib. Financial Times qəzetinin məlumatına görə, o, bu ideyanı ABŞ-ın Fransadakı səfiri Çarlz Kuşnerlə Berlində keçirilən görüşdə müzakirə edib.

Təklifin arxasında Avropada TikTok-un fəaliyyətinə daha çox nəzarət edilməsi və platformanın idarəçiliyində Avropa şirkətlərinin rolunun artırılması ideyası dayanır. ABŞ-da TikTok-un fəaliyyəti ilə bağlı milli təhlükəsizlik narahatlıqları nəticəsində yaradılmış birgə müəssisə modeli Avropa üçün də mümkün nümunə kimi nəzərdən keçirilir.

Sonxeber.az Financial Times-a istinadən xəbər verir ki, Axel Springer-in rəhbəri əvvəllər TikTok-u ekstremist məzmunun yayılmasına şərait yaratmaqda tənqid edib və platformanın Avropa nəzarətində fəaliyyət göstərməsini dəstəkləyib. Bununla belə, onun təklifinin Avropa Komissiyası və TikTok-un sahibi ByteDance tərəfindən ciddi dəstək almadığı bildirilir.

Məsələ media bazarında rəqabətin yeni mərhələsini göstərir. Axel Springer artıq Politico, Business Insider və Böyük Britaniyanın The Telegraph nəşri ilə əlaqəli media aktivlərinə sahibdir. TikTok-un Avropa bölməsində pay əldə etmək şirkətə həm xəbər istehsalı, həm də rəqəmsal yayım sahəsində mövqelərini gücləndirmək imkanı verə bilər.

Müəllif: İlkin Məmmədkərimov

Telegramda izləyin