Kombilər söküləcək? Azərbaycanda istilik sistemləri ilə bağlı yeni plan - İQTİSADÇIDAN AÇIQLAMA

Azərbaycanda evlərin istilik sistemində dəyişikliklər nəzərdə tutulur. 2035-ci ilədək mövcud yaşayış və kommersiya binalarında qazla işləyən avadanlıqlardan elektrik istilik nasoslarına keçidin təmin edilməsi hədəflənir. Bu plan evində qazla işləyən kombi quraşdıran ailələrdə gələcəkdə istilik sistemini dəyişmək məcburiyyətində qalıb-qalmayacaqları ilə bağlı suallar yaradır.

Bəs yeni strategiya indiyədək kombi quraşdıran ev sahibləri üçün nə deməkdir? Vətəndaşlar mövcud cihazlarını sökdürməli olacaqlarmı? Elektrik istilik nasoslarına keçid ailələrin kommunal xərclərinə necə təsir edəcək və bu dəyişiklik hansı mərhələlərlə həyata keçiriləcək?
Mövzu ilə bağlı Liberal İqtisadçılar Mərkəzinin sədri Akif Nəsirli Sonxeber.az-a açıqlamasında bildirdi ki, hələlik kombinizi söküb atmaq barədə məcburi qərar yoxdur. Mövzu iki ayrı sənəd ətrafında qarışdırılır. Birinci, uzunmüddətli Aşağıkarbonlu İnkişaf Strategiyası bu günlərdə gündəmdədir. Sənəddə 2035-ci ilədək mövcud yaşayış və kommersiya binalarında elektrik istilik nasoslarına keçid hədəfi müəyyənləşib. Bu, hədəf və istiqamətdir, bu gün sökülmə tələbi deyil. Deputat Vüqar Rəhimzadə də qazla işləyən kombilərdən istifadənin gələcəkdə mərhələli şəkildə dəyişə biləcəyini bildirib. Burada söhbət qazdan birbaşa elektrik sobasına keçiddən yox, istilik nasoslarından gedir. Onlar ayrıca texnologiyadır və elektrik enerjisini istiliyə daha səmərəli çevirir. Mərhələlər, təşviqlər və son qaydalar hələ açıqlanmayıb.

İkinci, Nazirlər Kabinetinin binalar üçün qərarı var. Yeni qaydalara görə, binalar layihələndirilərkən fərdi istilik sisteminə yalnız 5 mərtəbəyə qədər olan binalarda icazə veriləcək. Qərarda açıq göstərilir ki, yeni tikililər bu normativlərə uyğun layihələndirilməlidir, mövcud binalarda isə fərdi istilik sistemləri istifadədə qalacaq. Yəni bu qərar əsasən yeni tikiləcək çoxmənzilli binalara aiddir.

Bir məqam var, Energetika Nazirliyinin rəsmisi AzTV-də Bakıda mövcud çoxmərtəbəli binaların da gələcəkdə mərkəzi istilik sisteminə qoşulmalı olacağını deyib. Bu, mövcud çoxmənzilli binalar üçün də dəyişiklik ehtimalını göstərir, amma konkret tarix və qaydalar bəlli deyil.

Yəni fərdi evdə yaşayırsınızsa, hazırkı məlumatlara görə sizə birbaşa təsir edən məcburi qərar yoxdur. Mövcud coxmərtəbəlu binada yaşayırsınızsa, kombiniz hələlik işləyə bilər. Gələcəkdə mərkəzləşdirilmiş istiliyə qoşulma və ya istilik nasosuna keçid təşviq oluna bilər. Yeni mənzil alırsınızsa, binanın mərtəbə sayına və istilik sisteminə mütləq baxın.

Qaydalar hələ dəqiqləşməyib, ona görə yeni təhlükəli bir addım atmazdan əvvəl (məsələn, kombini dəyişmək) Energetika Nazirliyinin və "Azəriqaz"ın rəsmi açıqlamalarını gözləmək məsləhətdir. Digər tərəfdən, mərkəzləşdirilmiş istilik sistemi praktiki olaraq daha qənaətli istilik sistemidir.

Müəllif: İlkin Məmmədkərimov

Telegramda izləyin