Peşə təhsili müəssisələrində yüzlərlə vakansiya niyə boş qalıb? - AÇIQLAMA

Peşə təhsili müəssisələrində yüzlərlə vakant ştatın boş qalması bu sahədə kadr təminatı, əməkhaqqı və tədrisin keyfiyyəti ilə bağlı məsələləri gündəmə gətirir. Vakansiyaların uzun müddət doldurulmaması həm tədris prosesinə, həm də əmək bazarının tələblərinə uyğun ixtisaslı mütəxəssislərin hazırlanmasına təsir göstərə bilər. Bu vəziyyətin səbəblərini müəyyənləşdirmək üçün müəllim və istehsalat təlimi ustalarının iş şəraiti, əməkhaqqı, ixtisaslı kadrların mövcudluğu və peşə təhsilinə maraq kimi amillər nəzərə alınmalıdır.

Bəs, peşə təhsili müəssisələrində vakant ştatların boş qalmasının əsas səbəbləri hansılardır və bu problemi aradan qaldırmaq, ixtisaslı kadrları sahəyə cəlb etmək və təhsilin keyfiyyətini yüksəltmək üçün hansı addımlar atılmalıdır?
Mövzu ilə bağlı Sonxeber.az-a açıqlama verən təhsil eksperti Məzahir Məmmədli bildirib ki, peşə təhsili müəssisələrində son vaxtlar həm tədris proqramlarının yenilənməsi, həm də kadr islahatları həyata keçirilir.

"Bunun əsas səbəbi uzun müddət istifadə olunan köhnə proqramların, laboratoriyaların, infrastrukturun, texniki və simulyasiya avadanlıqlarının yenilənməsinə ehtiyacın olmasıdır. Hazırda bu istiqamətdə işlər aparılır və yenilənmələrə uyğun olaraq müvafiq vakansiyaların da təmin edilməsi vacibdir. Son vaxtlar mediada və sosial şəbəkələrdə peşə təhsili müəssisələrində kadr çatışmazlığı, eləcə də siniflərin birləşdirilməsi halları ilə bağlı məlumatlar yayılır. İstisna etmirəm ki, bəzi müəssisələrdə belə hallar mövcud ola bilər. Ancaq vakant yerlərin doldurulması üçün yenilənmiş proqramlara uyğun bilik və bacarıqlara malik kadrlar cəlb edilməlidir. Düşünürəm ki, bu istiqamətdə mütəxəssislərin axtarışı və seçilməsi üçün müvafiq addımlar atılmalıdır".

Ekspert bildirib ki, hazırda bu problemlərin konkret hansı peşə təhsili müəssisələrində yaşandığını göstərən ciddi faktlarım yoxdur.

"Təəssüf ki, yayılan məlumatlarda da konkret müəssisə adı çəkilmir, sadəcə ümumi şəkildə vakansiyaların boş qaldığı bildirilir. Bununla belə, yeni proqramlara uyğun kadrların hələ tapılmaması səbəbindən bəzi müəssisələrdə boşluqların yaranması mümkündür".

Röyalə Xəyal

Telegramda izləyin