Mərkəzi Bank hərrac platformasını təkmilləşdirib

Mərkəzi Bank valyuta və depozit hərraclarını Blumberq hərrac platforması vasitəsilə həyata keçirir. Sonxeber.az xəbər verir ki, Mərkəzi Bankdan "Qafqazinfo"ya daxil olan məlumata görə, özünün çevik hərrac üsulları ilə valyuta və depozit hərraclarının təşkil edilməsi sahəsində qabaqcıl texnologiyalarını təqdim edən Blumberq hərrac platforması hazırda MB tərəfindən həmin pul siyasəti əməliyyatları üzrə vahid platforma rolunu oynayır.

Maliyyə nazirliklərinə və mərkəzi banklara maliyyə bazarlarında əməliyyatların həyata keçirilməsi şəraitini yaradan bu platformanın texniki imkanları son zamanlar daha da genişləndirilib. Belə ki, Blumberq hərrac platforması əvvəllər yalnız qiymətli kağızlarla alqı-satqı və repo əməliyyatların aparılmasını dəstəkləyirdisə, Mərkəzi Bankın təşəbbüsü ilə platformaya valyuta ("spot" və "forvard") və depozit hərraclarının təşkil edilməsi imkanı da əlavə edilərək təkmilləşdirilib.
Qeyd edək ki, Blumberqin çoxtərəfli (multi-asset) hərrac platforması bazar iştirakçılarına Mərkəzi Bankın hərraclarını izləmək və hərraclarda iştirak etmək imkanını yaradır.

Telegramda izləyin

instagramda izləyin