Bahar Muradova: "Qətnamə azərbaycanlılar üçün təhqirdir"
"Avropa Parlamentinin qəbul etdiyi qətnamə bütün azərbaycanlılar üçün təhqirdir. Kimsə bundan istifadə etməyə çalışırsa, bilin ki, onların arasında əlaqə var".
Bu sözləri Milli Məclisin sədr müavini Bahar Muradova bu gün keçirilən növbədənkənar plenar iclasda deyib.
O, ilk olaraq soydaşlarımıza səslənib: "Mən ictimai qurumlara, vətəndaşlara, hər bir azərbaycanlıya səslənirəm. Bu məsələdə Azərbaycanın mövqeyindən çıxış etməyə çalışın. Azərbaycanı Avropa ilə əlaqələri kəsməkdə ittiham etməyin. Azərbaycan bunda maraqlı deyil".
Vitse-spiker qeyd edib ki, Azərbaycan illər ərzində çox tribunalarda çıxışlar, çağırışlar edib: "Beynəlxalq tribunalarda çıxışlarımızın, çağırışlarımızın əsasında beynəlxalq hüququn prinsipləri dayanıb. Ancaq bizə qarşı qərəzli mövqe nümayiş olunur".
O, bu tipli sənədlərin qəbulunda görünən və görünməyən tərəflərə diqqəti yönəldib: "Bu qətnamənin axasında çox gizli hədəf və məqsədlər gizlənib. Nəyə görə BMT-nin Dağlıq Qarabağla bağlı sənədlərinin icrasına belə qəti çağırış edilmir. Son illərdə baş verən hadisələr göstərir ki, Avropanı heç də dövlətlərin ərazi bütövlüyü narahat etmir. Bu təşkilatlar qarşılarına dövlətlərin müstəqilliyinin sarsılması və ərazi bütövlüyünün pozulması kimi məqsəd qoyublar. Belə hadisələr onların işilərinə yarayır. Əsl mənada fundamental insan haqlarına düzgün yanaşan təşkilatları bu qurumlarla bir sıraya qoymamalıyıq. Bunu təkcə Azərbaycan tipli ölkələrə yönəlmiş qərəz kimi qəbul etmirəm. Avropa Parlamentinin qəbul etdiyi qətnamə cinayətkarcasına bütün Avropa xalqlarına yönəlmiş qərardır. Bu, ilk növbədə avropalıların həyatına təsir edəcək. Avropalılara üzümü tutub deyirəm ki, özünüzü bu məsələlərdən kənarda bilməyin. Bu, dini, irqi və etnik ayrı-seçkiliyə gətirib çıxaran siyasətdir".
B. Muradova hər bir Azərbaycan vətəndaşını məsələyə daha qlobal yanaşmağa, bunu bəşəri bir problem kimi qəbul etməyə çağırıb: "Bu məsələdə əlbir olsaq, dünyanı xilas edəcəyik. Dünya təhlükədədir".
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş