"Yaşlı adamlar, hamilə qadınlar və uşaqlar evdən bayıra çıxmasınlar" - XƏBƏRDARLIQ...

Ekologiya və Təbii Sərvətlər Nazirliyi Ətraf Mühit üzrə Milli Monitorinq Departamentinin mütəxəssislərinin apardığı monitorinqlərin nəticələrinə əsasən aprelin 18-i və 19-u tarixində ölkə ərazisində havada olan tozun miqdarının sanitar normadan artıq olacağı bildirilib. Nazirliyin məlumatına görə buna səbəb ölkə ərazisinə Ərəbistan yarımadasından cənub-qərb küləkləri vasitəsilə toz-dumanın daxil olmasıdır.

Tibb elmləri doktoru, professor Adil Qeybulla Moderator.az-a açıqlamasında bildirib ki, belə havada insanların bayırda uzun müddət olması məsləhət deyil:

"Ümumiyyətlə, belə təbiət hadisələrinin hər birində ölkə qoruyucu tədbirlər görməlidir. Sadəcə olaraq ayrı-ayrı situasiyalarda bu tozun mənşəyi və insan orqanizminə vura biləcəyi zərər öyrənilməlidir. Bununla bağlı əhali arasında təbliğat aparılmalıdır. Yaxşı olar ki, belə hava şəraitində insanlar bayırda çox vaxt keçirməsinlər. İnsanlar belə havayla təmasda az olmalıdırlar".

A.Qeybula deyib ki, belə havada qoruyucu maskalardan istifadə etmək lazımdır:

"Belə toz-dumanın nəfəs yollarına daxil olmasının qarşısını almaq üçün qoruyucu maskalardan istifadə etmək lazımdır. Xüsusilə ictimai nəqliyyatda və əhalinin sıx olduğu yerlərdə bu maskalardan istifadə etmək vacibdir. Tozlu hava şəraitində yaşlı adamlar, hamilə qadınlar və uşaqlar mümkün qədər evdən bayıra çıxmasınlar. Bakı küləkli şəhər olduğu üçün pəncərələr bağlı saxlanılmalıdır. Burda məqsəd belə hava şəraitində onun nəfəs yollarına daxil olmasının qarşısını almaqdır. Belə təbiət hadisələri mütəmadi olaraq baş verir və insanlar da çalışmalıdırlar ki, özlərini qorusunlar".

Telegramda izləyin

instagramda izləyin