Vitse-prezidentlər də yenidən təyin olunacaq? - DEPUTATDAN AÇIQLAMA

"Azərbaycanda prezident seçkisindən sonra Konstitusiyaya görə yalnız Nazirlər Kabineti tam tərkibdə istefaya göndərilir. Ondan kənarda ali icra hakimiyyəti orqanlarının fəaliyyəti ilə bağlı hər hansı norma və ya tələb Konstitusiyada nəzərdə tutulmayıb".

Sonxeber.az xəbər verir ki, bunu Qafqazinfo-ya açıqlamasında deputat Zahid Oruc Nazirlər Kabinetinin istefaya göndərilməsindən sonra məsələnin vitse-prezidentlik institutuna şamil edilib edilməyəcəyi ilə bağlı yaranan suallara aydınlıq gətirərkən deyib.

O bildirib ki, 2016- cı il referendumuna görə ölkənin idarəçilik sistemində özünə yeni olaraq yer alan vitse-prezidentlik institutu ilə bağlı belə bir qərarın verilməsinə qətiyyən ehtiyac yoxdur:

"Hesab edirəm ki, bu həm birinci vitse-prezidentə, həm də vitse-prezidentlərə aiddir. Onların təyin edilməsi səlahiyyəti ölkə prezidentinə aiddir. Çünki ali icra hakimiyyətinin vəzifədən getməsi və ya onların 7 illik seçki dönəmindən sonra yenidən təyinatının baş verməsinə də ehtiyac yoxdur. Əlbəttə ki müxtəlif ölkələrdə fərqli məqamların olduğundan danışmaq mümkündür. Amerikada hər iki institut seçki vasitəsilə müəyyənləşir. Amma Azərbaycanda prezident birinci vitse-prezidenti təyin edir.

Azərbaycanda həm ölkə daxilində, həm də beynəlxalq məkanda çox böyük fəaliyyəti ilə seçilən, Azərbaycan vətəndaşlarının etibar və inamını qazanan Mehriban Əliyevanın birinci vitse-prezident olaraq fəaliyyətinin fərqindəyik. Hesab edirəm ki, bu mənada onların yenidən təyinatına ehtiyac yoxdur".

Telegramda izləyin

instagramda izləyin