Azərbaycanda toy günü faciə - FOTO

Qardaşının toy günü səfil həyatı sürən şəxsi öldürməkdə təqsirli bilinən Nərimanov rayon sakini yenidən məhkəmə qarşısına çıxarılacaq.

Cinayət məcəlləsinin 126.3-cü maddəsi ilə təqsirli bilinərək həbs edilən İsmayılov Tural Zakir oğlu bəraət almaq məqsədi ilə Ali Məhkəməyə şikayət edib. Aprel ayının 24-də hakim Gülzar Rzayevanın sədrliyi ilə məhkəmə baxışı keçiriləcək.

Belə ki, 2017-ci il oktyabr ayının 5-də Bakı Ağır Cinayətlər Məhkəməsində cinayət məcəlləsinin 126.3-cü maddəsi ilə təqsirləndirilən Tural İsmayılov 9 il 6 ay müddətinə azadlıqdan məhrum edilib.
Qeyd edək ki, T.İsmayılovun bu cinayəti törətməsi müəmmalar doğurub. Təqsirləndirilənin vəkili məhkəmə bildirib ki, T. İsmayılov hadisə baş verən gün qardaşı Bəhruz İsmayılovun toyunda olub:

"Videokameralarda görünən adamın üzü saqqallıdır. Turalın isə saqqalı yoxdur. Ondan təzyiqlə ifadə alıblar, heç bir sübut yoxdur".

Xatırladaq ki, hadisə 2016-cı il aprelin 17-də qeydə alınıb. Belə ki, Nərimanov rayonu Əhməd Rəcəbli küçəsi 9 ünvanından Bakı şəhər sakini, səfil həyatı sürən 57 yaşlı Rufiz Mirzəyev kəsilmiş-deşilmiş xəsarətlə xəstəxanaya gətirilib və orada ölüb. Polis və prokurorluq orqanları əməkdaşlarının həyata keçirdikləri əməliyyat-axtarış və istintaq tədbirləri nəticəsində 4 ay sonra- avqust ayının 23-də hadisəni törətməkdə şübhəli bilinən Bakı şəhər sakini, əvvəllər məhkum olunmuş Tural İsmayılov tutulub.

mənbə: olke.az

Telegramda izləyin

instagramda izləyin