"Akkord" Xırdalanda yeni zavod açdı

Şirkət gördüyü işləri və planlarını da açıqladı

Dekabrın 19-da İqtisadiyyat və Sənaye naziri Şahin Mustafayev Xırdalan Metal Konstruksiyalar Zavodunda müəssisənin daxil olduğu "Akkord Sənaye Tikinti İnvestisiya Korporasiyası"nın nümayəndələri ilə görüşmüşdür.

Görüşdə sənayenin ayrı-ayrı sahələrinin inkişafı barədə danışan nazir Şahin Mustafayev qeyri-neft sektorunun inkişafında "Akkord" şirkətinin uğurlu fəaliyyətini qeyd etmiş, şirkətin tikinti-quraşdırma işləri ilə yanaşı, inşaat sektorunun tikinti materiallarına olan tələbatının yerli məhsullar hesabına ödənilməsində əhəmiyyətli rolunu vurğulamışdır. Yeni fəaliyyətə başlamış Xırdalan Metal Konstruksiyalar Zavodu da qeyri-neft sektorunun inkişafına və ölkəmizin sənaye potensialının güclənməsinə öz töhfəsini verəcəkdir.

GƏLƏN İL YENİ MÜƏSSİSƏLƏR İSTİFADƏYƏ VERƏCƏK

Bildirilmişdir ki, 10 ildir sənaye və tikinti sahəsində fəaliyyət göstərən "Akkord Sənaye Tikinti İnvestisiya Korporasiyası"na sənayenin müxtəlif sahələrində, o cümlədən mərmər-qranit emalı, sement, beton, asfalt, kərpic, metal-konstruksiya və yüngül sənaye sahələri üzrə 39 müəssisəni əhatə edən 15 şirkət daxildir. Korporasiyanın fasad texnologiyaları və plastik qapı-pəncərə istehsalı müəsisələrinin gələn il istifadəyə verilməsi nəzərdə tutulur.

1,5 MİLYARD DOLLARLIQ İNVESTİSİYA TƏKLİFİ

"Akkord Sənaye Tikinti İnvestisiya Korporasiyası"nda 3700-dən çox işçi çalışır. Hazırda Korporasiyanın bir sıra xarici ölkələrdə, o cümlədən Çin, Rusiya, İran, Oman və Küveytdə nümayəndəlikləri yaradılır. Korporasiya xarici ölkələrdə reallaşdırılan və dəyəri 1,5 mlrd. dollar olan layihələrdə iştirak etmək üçün investisiya təklifi ilə çıxış edib. "Akkord"un cari tikinti layihələrinin ümumi dəyəri 901 mln. manatdır.

QƏTƏR BAZARINA DAXİL OLA BİLƏR

Şirkət Türkiyədə hər birinin gücü 150 mvt/saat olan 3 elektrik stansiyasının tikintisi ilə bağlı müraciət edib. Bundan başqa, Cənubi Koreyanın "Hyundai" şirkəti ilə birgə İranda elektrik stansiyasının tikintisi, Qətər Əmirliyində sənaye sahəsində həyata keçiriləcək layihələrdə iştirakla bağlı danışıqlar aparılır.

GÜRCÜSTANA SEMENT İXRACINA BAŞLAYACAQ

Rəqabət qabiliyyətli məhsul istehsal edən "Akkord" 2016-cı ildə Gürcüstana sement istehsalının əsas komponenti olan 200 min ton klinker ixrac etməyi planlaşdırır.

DİRƏKDƏN TUTMUŞ DAM ÖRTÜLƏRİNƏ QƏDƏR İSTEHSAL EDİR

"Akkord Sənaye Tikinti İnvestisiya Korporasiyası"nın yeni yaradılan Xırdalan Metal Konstruksiyalar Zavodu 5,5 hektar ərazidə inşa edilib. Zavod ABŞ, Türkiyə, Almaniya və Finlandiyanın istehsalı olan ən müasir avadanlıqlarla təchiz olunmuşdur. Zavod 3 əsas istehsal sexindən - Metal konstruksiya, Metal əritmə və Fasad üzlük istehsalı sexlərindən ibarətdir. Bununla yanaşı, zavodun ərazisində sahəsi 2600 m2 -ə yaxın inzibati bina, laboratoriya, qazanxana, su anbarı, nasosxana və transformator yarımstansiyası inşa edilmişdir.

BİR NÖVBƏDƏ 450 İŞÇİ ÇALIŞACAQ

Müəssisədə müxtəlif növ metal konstruksiyalar, sement zavodları üçün qurğular, dam örtükləri, işıq dirəkləri və s. istehsal edilir. Müəssisə ildə 10 min ton məhsul istehsal etmək gücünə malikdir. Bununla yanaşı, müəssisə layihələndirmə və montaj işlərini də həyata keçirir. Hazırda zavodda 100-ə yaxın şəxs işlə təmin olunmuşdur. Gələcəkdə işçilərin sayının bir növbədə 450 nəfərə çatdırılması nəzərdə tutulur.

Zavodda işçilər üçün hər cür şərait yaradılmışdır. Zavodda işləyənlər üçün tibb məntəqəsi və digər sosial obyektlər istifadəyə verilmişdir. Zavodun müasir tələblərə cavab verən yeməkxanasında işçilər pulsuz yeməklə təmin olunur. Bundan başqa, işçilərin rahat gəliş-gedişi üçün xüsusi nəqliyyat vasitələri ayrılmışdır.

Müəssisənin müasir və geniş Sərgi-Konfrans salonunda"Akkord Sənaye Tikinti İnvestisiya Korporasiyası"nın istehsal etdiyi məhsullar nümayış olunur. Burada Korporasiyanın ən qabaqcıl texnologiyalara əsaslanan məhsulları ilə tanış olmaq imkanı yaradılmışdır.

Telegramda izləyin