Umayra Tağıyeva: "Artıq Rusiyada yaşayan soydaşlarımız da bizə zəng vurmağa başlayıblar"

"Bakıda yağış sulu qara keçib, şiddətli külək əsir. Küləyin maksimal sürəti saniyədə 25-30, arabir 35 metrə çatır. Xəzər dənizi akvatoriyasında yüksək dalğa müşahidə olunur". Bu sözləri yeniavaz.com saytına açıqlamasında Milli Hidrometeorologiya Departamentinin direktoru Umayra Tağıyeva hazırda müşahidə olunan hava ilə bağlı deyib.

Umayra Tağıyevanın sözlərinə görə, dalğanın hündürlüyü açıq dənizdə 6,2 metr təşkil edir: "Bu gün ərzində əlverişsiz hava şəraiti davam edəcək, bizim xəbərdarlığımız öz qüvvəsindədir.
Onu da qeyd edim ki, vətəndaşlardan fasiləsiz zənglər daxil olur: "Biz bütün zəngləri cavablandırmağa çalışırıq, eyni zamanda KİV-lər burdadır və hər 1 saatdan bir onların vasitəsilə biz ictimaiyyəti məlumatlandırırıq. Həm prosesin gedişatı, həm də davamiyyəti ilə bağlı ətraflı məlumatları təqdim edirik.

Bizə Azərbaycanın müxtəlif regionlarından, Rusiyanın müxtəlif şəhərlərindən zənglər daxil olur, orada yaşayan vətəndaşlarımız Azərbaycanda olan qohumlarından nigarandırlar, ətraflı məlumat istəyirlər. Biz də o məlumatları onlara təqdim edirik".

"Bu gün ərzində axşam saatlarında bu prosesin ən kəskin dövrü müşahidə olunacaq. Proses ayın 18-də səngiməyə başlayacaq, gündüz saatlarından başlayaraq külək mülayimləşəcək, lakin dənizdə yüksək dalğa davam edəcək. Buna görə də yanvarın 18-də xəbərdarlığımız dəniz akvatoriyası üçün öz qüvvəsində qalacaq",-deyə Umayra Tağıyeva vurğulayıb.

Telegramda izləyin