Deputat: "Ermənistanda başda Paşinyan olmaqla hamısı ağlını itirib"
"Azərbaycan Ermənistandan fərqli olaraq müstəqil ölkədir və istədiyi zaman hərbi təlimlər keçirib, ordusunun döyüş qabiliyyəti səviyyəsini yoxlaya bilər".
Bunu "Ölkə.Az"-a açıqlamasında millət vəkili Fəzail İbrahimli Azərbaycan Ordusunuhn genişmiqyaslı hərbi təlimlərinin erməni tərəfindən qorxu ilə qarşılamasına mövqeyini açıqlayarkən deyib.
Onun sözlərinə görə, Azərbaycan bir müstəqil dövlət olaraq mütəmadi şəkildə Silahlı Qüvvələrinin döyüş hazırlıq səviyyəsini yoxlayır. Ordunun peşəkarlığının artırılması, yeni silahlarla davranış təcrübəsinin artırması üçün belə təlimlərə ehtiyac var:
"Hazırda keçirilən təlimlər də buna xidmət edir və bu təlimlər bir daha söylədiyim kimi kimsəyə qarşı yönəlməyib. Sadəcə ordunun daim döyüş hazırlıq səviyyəsində saxlanmasına xidmət edir".
Ermənistan rəsmilərinin və ekspertlərinin səsləndirdiyi fikrə gəldikdə millət vəkili vurğulayıb ki, başda Paşinyan olmaqla hamısı başını itirib.
"Bilirsiniz hiyləgərlik və məkr üzərində qurulan siyasətin heç zaman müsbət sonluğu ola bilməz. Paşinyan anlamalıdır ki, onun məkr və hiyləgərliyinin bir sonu olacaq. Avropanı, Rusiyanı, erməni lobbisini və daxildə erməni xalqını aldatmaqla hakimiyyətdə uzun müddət qalmaq mümkün deyil. Paşinyan bütün tərəfləri aldada-aldada gününü keçirməklə məşğuldur. Bu nə qədər davam edəcək demək çətindir. Bu bir qismət payıdır ki, hələlik bu yolla gedir. Görək sonu nə olur", - deyə millət vəkili vurğulayıb.
F.İbrahimli əlavə edib ki, Paşinyanı da Köçəryanın taleyi gözləyir:
"Sonunda ola bilsin ki, o da Robert Köçəryanla bir həbsxanada yatsın və onun kamera qonşusu olsun… Çünki bunların hər biri qan-qada ilə hakimiyyətə gəlib, başqa ölkənin torpaqlarını işğal ediblər. Bunun da bir sonu var. Hakimiyyəti qan-qada, işğalla saxlamaq mümkün deyil. Xalqa isə dolanmaq lazımdır. Bu isə Ermənistanda mümkün deyil".
F.İbrahimli deyib ki, Paşinyan da digər sələfləri kimi xalqı aldatmaq yolunu tutub, yalançı şüarlar səsləndirməklə məşğuldur.
"Xalqı yalan şüarlarla yemləmək olmur. Bu uzun çəkə bilməz. Xalqa çörək, su vermək lazımdır. Paşinyan da ermənilərə bunu verə bilmir və verə də bilməyəcək. Birincisi, Ermənistan forpost ölkədir və bundan xilas ola bilmir. Digər tərəfdən nə qədər ki, işğal altında olan Azərbaycan torpaqları işğaldan azad olunmayıb, Ermənistanda normal həyat şəraiti qurulmayacaq. Bunun üçün torpaqlar işğaldan azad olunmalıdır. O baxımdanda Paşinyan girinc vəziyətdə qalıb və heç nə edə bilmir. Hara da gedirsə, əliboş qayıdır", - deyə deputat bildirib.
Hərbi təlimlərə toxunan millət vəkili onu da əlavə edib ki, bu gün Azərbaycan müstəqil ölkə olaraq müstəqil siyasət yürüdə bildiyindən iqtisadiyyatını inkişaf etdirib, ordusunu güclənidirir.
"Məqsəd də bəllidir. Günün birində işğal altında olan torpaqları işğaldan azad etmək. Bunu gizlətmirik də… Ölkə başçısı da dəfələrlə bunu bəyan edib. Əgər torpaqlarımızın danışıqlar yolu ilə azad olunması mümkün olmayacaqsa, o zaman məsələni ordu həll edəcək. Ancaq indi biz səbrlə gözləyib məsələni beynəlxalq hüquqa əsaslanaraq, kimlərəsə əsas verməmək üçün danışıqları davam etdiririk. Bu mümkün olmayanda təbii ki, sözü Azərbaycan ordusu deyəcək. Çünki haqq və güc bizim tərəfdədir. Biz bunu qısa zamanda güc yolu ilə həll etməyə qadirik", - deyə F.İbrahimli bildirib.
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş