Paşinyan diplomatiyada autizm-simuliyasiya xəstəliyinə düçar olub - DEPUTAT

"Paşinyan diplomatiyada autizm-simuliyasiya xəstəliyinə düçar olub və onun iddialarına özündən başqa heç kəs reaksiya vermir". Bunu Sonxeber.az-a Milli Məclisin deputatı Hikmət Babaoğlu Ermənistanın Baş naziri Nikol Paşinyanın Ermənistan-Azərbaycan, Dağlıq Qarabağ münaqişəsinin həllində qondarma rejimin tərəf kimi iştirakıyla bağlı fikirlərini şərh edərkən deyib.

Onun sözlərinə görə, Ermənistanın danışıqlardan yayınmaq cəhdi baş tutmayacaq. Deputat hesab edir ki, Azərbaycanın son dövrlərdə həyata keçirdiyi xarici diplomatik həmlə və gedişlər qısa müddətdə öz nəticələrini verməkdədir. H. Babaoğlu məhz ATƏT in Minsk qrupu həmsədrlərinin bəyanatını da bu kontekstdən qiymətləndirir: "Nikol Paşinyan regiondakı geostrateji reallığa öz siyasi illuziyası ilə yanaşır və əsası olmayan arqumentlər irəli sürməklə mövcud reallığı və beynəlxalq hüququ manipuliyasiya edəcəyini düşünür" .

Millət vəkili bildirib ki, Ermənistanın Azərbaycan torpaqlarını işğal faktı sonsuza qədər davam edə bilməz: "Azərbaycan dövləti və xalqı buna imkan verməyəcək. Azərbaycan ordusunun keçirdiyi genişmiqyaslı hərbi təlimlər əslində Azərbaycan ordusunun nəyə qadir olmasının göstəricisidir. Bu təlimlərin işğalçı ölkədə doğurduğu əks-səda və yaratdığı qorxu əbəs deyil. Ermənistanda 2016-cı il aprel və 2018 -ci il "Günnüt döyüşləri"ni yaxşı xatırlayırlar".

H. Babaoğlu vurğulayıb ki, Ermənistanın müdafiə naziri David Tonoyan təlimlərdə iştirak edən hərbi texnika və şəxsi heyətin sayından ciddi narahatlıq keçirib və bunu Azərbaycan Prezidenti və Ermənistanın Baş naziri arasında keçirilməsi nəzərdə tutulan görüşdən öncə rəsmi Bakının hərbi təzyiqi kimi qiymətləndirib: "Erməni nazir hesab edir ki, guya belə təlimlərdən əvvəl ATƏT-in müvafiq strukturları məlumatlandırılmalıdır. Ancaq heç yadına düşmür ki , ATƏT və onun Minsk qrupunun həmsədrləri Ermənistandan soruşmalıdırlar ki , sənin ordun qonşu ölkənin ərazisində nə gəzir?".

O əlavə edib ki, Azərbaycan Ermənistanın status-kvonu legitimləşdirmək cəhdlərinə yol verməyəcək: "Rəsmi Bakı hər şeydən öncə öz ordusunun, iqtisadiyyatının gücünə və beynəlxalq nüfuzuna arxalanır. Həmsədrlərin son bəyanatı da onların regionda Azərbaycanın nəyə qadir olması və problemin həlli ilə bağlı götürdükləri öhdəçilikdən irəli gəlir. BMT Təhlükəsizlik Şurası ATƏT-in Minsk Qrupu həmsədrlərinə vasitəçi kimi xüsusi mandatı ona görə verib ki, problemi həll etsinlər. Azərbaycan yoxsa bunu vasitəçilərə ehtiyac qalmadan özü edəcək".

Rövşən Rəhimli

Telegramda izləyin

instagramda izləyin