Vitse-spiker: Baş nazirdən xahiş edirəm...

"Hökumətin hesabatında xarici əlaqələrə geniş yer ayrılıb. Görünür ki, bunun bir səbəbi də baş nazirin və Nazirlər Kabinetinin Aparat rəhbərinin ömürünün böyük bir hissəsini xarici siyasətə həsr etməsi ilə bağlıdır".

Sonxeber.az-ın məlumatına görə, bunu bu gün Milli Məclisdə Nazirlər Kabinetinin 2018-ci ildə fəaliyyəti haqqında hesabatının müzakirə olunduğu plenar iclasda vitse-spiker Bahar Muradova bildirib.

B. Muradova parlamentlə hökumətin xarici siyasət sahəsində əməkdaşlığını artırmasını vacib sayıb: "Bu yaxınlarda parlamentin beynəlxalq təşkilatlardakı nümayədə heyətlərinin rəhbərləri ilə Xarici İşlər Nazirliyinin görüşü keçirildi. Bu görüş çox effektli oldu. ATƏT Parlament Asambleyasının iclasında da mən bunun şahidi oldum".

Vitse-spiker qeyd edib ki, bu günlərdə keçirilən Bakı Humanitar Forumu bu gün Davos Forumu ilə müqayisə edilir: "Biz beynəlxalq təşkilatlarda fəallığımızı artımaqla Dağlıq Qarabağ münaqişəsinin həllinə nail ola bilərik. Biz eyni zamanda daha çox Azərbaycan vətəndaşlarının beynəlxalq təşkilatlarda çalışmasına nail olmalıyıq. Azərbaycan hökuməti BMT və digər beynəlxalq təşkilatlarda müxtəlif hesabatlar təqim edir. Azərbaycan parlamenti də bu hesabatların tərtib olunması işinə cəlb olunmalı, ən azı bu hesabatlar hazır olarkən bir nüsxəsi də parlamentə təqdim olunmalıdır. Çünki biz eyni formatlı tədbirlərdə müxtəlif mövqelər ortaya qoyuruq. Novruz Məmmədovdan xahiş edirəm ki, bu fərqli məqamların olmaması üçün bir-birimizi daha çox məlumatlandıraq və əməkdaşlıq edək".

B. Muradova nəzərə çatdırıb ki, əvvəllər Azərbaycanı işğal olunmuş ərazilərə səfər edənlərin "qara siyahıya" salınmasına etiraz edən beynəlxalq təşkilatlar hazırda bu təcrübədən çıxış etməyə başlayıblar.

Telegramda izləyin

instagramda izləyin