"Rusiya Ermənistanın başını sığallayır" - Politoloq nazirlərin görüşü haqda danışdı
Xəbər verdiyimiz kimi, bu gün Moskvada Rusiyanın xarici işlər naziri Sergey Lavrovun iştirakı ilə Azərbaycan və Ermənistanın XİN rəhbərləri Elmar Məmmədyarov və Zöhrab Mnatskanyan arasında görüş keçirilir. Qapalı baş tutan görüş artıq başlanıb.
Tərəflər arasındakı görüşün ehtimal olunan nəticələri haqda politoloq Qabil Hüseynli BiG.AZ-a münasibət bildirib. Politoloq baş tutan görüş haqda fikir söyləməyin çətin olduğunu qeyd edib:
"Görüş haqqında fikir söyləmək artıq çətinləşib. Çünki tərəflər arasında görüş və Dağlıq Qarabağda sülh məsələsi böyük dövlətlərin və dövlətləratrası münasibətlərin bir növ çarpışma mənbəyinə çevrilib. Burada əsas detonatorda Rusiyadır. Bu məsələdə Amerika və Avropa ölkələri kimi bəzi ölkələr məsələnin həllinə çalışırlarsa, əksinə, Rusiya isə bu statusu qoruyub saxlamağa çalışır. Hətta müxtəlif diplomatik gedişlərlə məsələnin həllini dondurmaq istəyir. Bu nöqteyi nəzərdən Rusiya hər şeyi inhisara alıb və prosesin həlli üçün elə məsələlər irəli sürür ki, o məsələlər qəbuledilməz olur.
Bu gün də şübhə etmirəm ki, görüş zamanı Lavrov planı kimi tanınan plan yenidən ortaya atılsın. Bildiyiniz kimi, bu plana əsasən, 5 rayonun geriyə qaytarılması əvəzinə Dağlıq Qarabağ keçid statusunun verilməsi müzakirə obyekti ola bilər. Halbuki Dağlıq Qarabağa hər hansı statusun verilməsi Azərbaycanın ərazi bütövlüyünün pozulması deməkdir. Azərbaycan isə bu addımı ata bilməz. Bununla da danışıqların gedişində ciddi gərginlik yaranır".
Politoloq həmçinin Rusiyanın Ermənistanın başını sığalladığını, Ermənistanın sülh istəmədiyini qeyd edib:
"Bildiyiniz kimi, ötən ay iki ölkə başçısının Vyana görüşü baş tutub. Paşinyanın bu görüş haqda cəfəngiyat dolu sözlər söylədi. O, şərhi zamanı 3 saat görüş haqda yalnız ümumi məsələlərdən söhbət açdıqlarını deyib. Bunun bir tanışlıq söhbəti olması və s. haqda məlumat verib. Bütün bunlar Ermənistan cəmiyyətinin və hökumətinin sülh danışıqlarında maraqlı olmadığını sübut edir. Bundan başqa həm Vyana görüşü zamanı ermənilər atəşkəsi dəfələrlə pozması, indi də görüş zamanı hətta gecədən başlayaraq təmas nöqtəsindən atəşkəsin pozulması haqda xəbərlər gəlir. Bütün bunlar onu göstərir ki, Ermənistan məsələnin sülh istəmir və sülh proseslərinə əlində olan bütün imkanlarla mane olur. Rusiya isə Ermənistanın başını sığallayır".
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş