Volqoqradda Heydər Əliyevə SÜRPRİZ… - Video

Volqoqradda Heydər Əliyevə SÜRPRİZ… - Video1987-ci ilin 15-18 mart tarixlərində Heydər Əliyev Sovet İttifaqı Kommunist Partiyasının Mərkəzi Komitəsinin Siyasi Büro üzvü kimi Rusiyanın Volqoqrad şəhərinə səfər edib.

Sonxeber.az xəbər verir ki, bu barədə Volqoqrad televiziyasında yayımlanan Svetlana Yuriçevanın müəllifi olduğu "Narodı Volqoqrada" ("Volqoqrad xalqları") verilişində söhbət açılıb.

1987-ci ildə SSRİ Nazirlər Şurasının Sosial İnkişaf bürosunun sədri Heydər Əliyevin ölkə üzrə səfərləri nəzərdə tutulub və ilk səfərlərdən biri Volqoqrad şəhərinə edilib.

Həmin dövrdə 14 nazirlik, nəqliyyat və sosial sahələrə nəzarət edən Heydər Əliyev Volqoqradda müxtəlif sahələrin nümayəndələri və rəhbərləri ilə bir sıra görüş və müşavirələr keçirib.

Kamışınski pambıq-kağız kombinatı, bir sıra fabriklər (trikotaj, ayaqqabı), Volqoqrad traktor zavodu, mağazaları gəzib, ictimai iaşə obyektlərində, xəstəxanada, dəmiryol vağzalında sürət qatarı ilə gəzintidə olub, Politexnik Universitetində ali təhsil problemlərini müzakirə edib.

Qeyd olunub ki, bir neçə günlük səfər ərzində problemlər çox sürətlə həll edilib, çünki Heydər Əliyev problemlərin həlli istiqamətində müvafiq göstərişlər verib və onların həllinə nəzarət edib.

Həmçinin Heydər Əliyevin səfər çərçivəsində ziyarət etdiyi məktəblərdən birinin müəllim heyəti də verilişdə danışıb. Pedaqoq Valentina Usaçeva azyaşlı qızı ilə təhsil şöbəsində işlə bağlı saatlarla gözlədiyini, bu zaman ora təsadüfən Heydər Əliyevin gəldiyini, problem bildikdən sonra məsələni cəmi bir neçə dəqiqəyə həll etdiyini qeyd edib. Onun sözlərinə görə, körpənin göz yaşlarına laqeyd qalmayan ümummilli lider dərhal məsələnin yoluna qoyulması üçün göstəriş verib.

Veriliş boyu Heydər Əliyevin SSRİ-də qazandığı böyük nüfuz və onu digər siyasi xadimlərdən fərqləndirən peşəkarlıq, əməksevərlik, uzaqgörənlik kimi xüsusiyyətlərə də yer ayrılıb, SSRİ rəhbərliyinin bu dahi siyasi xadimə qarşı haqsız mövqedən danışılıb.

Səfərin sonunda volqoqradlılar Heydər Əliyevə xüsusi bir sürpriz ediblər. Belə ki, ümummilli liderin şərəfinə təşkil olunmuş mərasimdə ona armudu stəkanda çay verilib və bu jest Heydər Əliyevi razı salıb.

Yekunda isə Moskva ilə narazılıqlar fonunda Heydər Əliyevin ölkə qayıtdığı və rəhbərliyə başladığı, İlham Əliyevin bu gün də onun siyasi kursunu uğurla davam etdirdiyi qeyd olunub.

Siyasət   Baxılıb: 693   Tarix: 10 may 2019  

Şikayətiniz varsa Whatsapp: 055 6620257

Facebookda Paylaş

Unvan.az - elanlar sayti

DİGƏR MARAQLI XƏBƏRLƏR