"Ərimi öldür, kef edək..." – İki əmioğlunun qətl planında şok təfərrüat

Azərbaycanda qəsdən adam öldürməyə cəhddə ittiham olunan Ceyranbatan qəsəbə sakini, 1975-ci il təvəllüdlü Nailə Ağayeva, Abşeron sakini Aqil Baxşıyev və Lerik rayonunun Lərmərud kəndindən olan 1992-ci il təvəllüdlü Vəfalı Əliyevin cinayət işi üzrə məhkəmə prosesi başa çatıb.

Sonxeber.az teleqraf.com-a istinadla xəbər verir ki, Aqil Baxşiyevlə Nailə Ağayevanın yaxın münasibətindən əri Mail Ağayev şübhələnib.

Bu səbəbdən o, arvadına qarşı zorakılıq göstərib, onu təhqir edib.

İntim münasibət və qətl planı

Nailə zorakılıq və təhqirlərdən qurtulmaq, həmçinin Aqil Baxşiyevlə daha sərbəst formada görüşmək qərarına gəlib. Belə olmasa Aqil Baxşiyevə aralarında olan intim münasibəti kəsəcəyini bildirib.

Nailə Aqil Baxşəliyevi əri Maili öldürməyə təhrik edib. Aqil Baxşiyev qətli icra etmək üçün əmisi oğlu Vəfalı Əliyevlə razılığa gəlib. O, əmisi oğlu ilə cinayəti törətmək üçün qərarlaşandan sonra 22 iyun 2018-ci il tarixdə Masallı şəhərindəki mağazadan bıçaq alıb.

Vəfalı Əliyev Nailə Ağayeva ilə birlikdə həmin gün saat 15 radələrində onları evə aparması adı ilə Mail Ağayevə zəng edərək, Lerik rayonu Lərmərud kənd yolunun girişinə çağırıblar.

Qətli belə törətdilər

Mail Ağayev "UAZ" markalı avtomobili ilə onların dediyi yerə gəlib. Vəfalı və Nailə onun idarə etdiyi avtomobilə əyləşiblər.

Onlar avtomobillə yolun Yardımlı rayonu ərazisindən keçən hissəsinə qədər hərəkət ediblər. Daha sonra maşını yol kənarındakı yarımçıq tikilinin qarşısında saxladıblar. Orada pivə içiblər. Mail Ağayev avtomobilə tərəf hərəkət edərkən Aqil Baxşıyev də onun arxasınca gedib və ona bıçaqla zərbə endirib.

Mail dərhal avtomobilin kabinəsinə qaçıb, orada əl-ayaqları ilə Aqilə müqavimət göstərib. Bunu görən Vəfalı maşının arxa qapısından salona keçib, Mailin hər iki qolundan tutmaqla, onun müqavimət göstərməsinə mane olub.

Bundan istifadə edən Aqil Baxşiyev Mail Ağayevin sinə nahiyəsinə daha üç bıçaq zərbəsi endirib. Mail Ağayev aldığı xəsarətdən hadisə yerində ölüb.

Avto-qəza görüntüsü

Qatillər Mail Ağayevin yol-nəqliyyat hadisəsi zamanı ölməsi effektini yaratmaq üçün meyiti avtomobilin ön sərnişin oturacağına qoyaraq, maşını bir qədər irəli sürdükdən sonra dərəyə buraxıblar.

İstintaq orqanı tərəfindən Nailə Ağayevanın barəsində Cinayət Məcəlləsinin 32.4, 120.2.1-ci (iştirakçılıq, bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (təşkilat) tərəfindən adam öldürmə), digər iki təqsirləndirilən şəxslərin barəsində isə Cinayət Məcəlləsinin 120.2.1-ci (bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (təşkilat) tərəfindən adam öldürmə) maddəsi ilə ittiham elan edilib.

"Bankdan pulu götürə bilmədim"

Cinayət işi üzrə təqsirləndirilən şəxs qismində ifadə verən Vəfalı Əliyev elan olunmuş ittiham üzrə özünü təqsirli bilməyib.

O bildirib ki, 2000-ci ildən ailə üzvləri ilə birlikdə yaşadığı Bakı şəhərindən 2018-ci ilin iyul ayının ortalarında Lerik rayonuna gəlib: "Lerik rayonuna gəlməkdə məqsədim əmim qızının Ramazan bayramından sonra keçirilən toy mərasimində iştirak etmək idi.

Lərmərud kəndində yaşayan əmim oğlu Aqil Baxşıyevlə görüşdüm. Həmin ərəfədə Rusiyada olan tanışım bank vasitəsi ilə mənə pul göndərmişdi. Pulu bankdan götürmək üçün Aqildən mənimlə birlikdə Masallı şəhərinə getməyi xahiş etdim. Birlikdə Masallı şəhərinə getdik. Şəxsiyyət vəsiqəmin müddəti bitdiyi üçün bankdan pulu götürə bilmədim".

"Kürək nahiyəsinə zərbə endirdi"

Vəfalı Əliyevin sözlərinə görə, Lərmərud kəndinə qayıdan zaman Aqil taksi fəaliyyəti ilə məşğul olan həmkəndlisi Mail Ağayevə zəng edib: "Aqil Maildən yolun kənarından bizi götürərək kəndə aparmağı xahiş etdi. Mail idarə etdiyi "UAZ" markalı avtomobillə gəldi, həmin avtomobilə oturduq, kəndə doğru hərəkətə başladıq.

Yolda Aqil maşını saxladı, yolun kənarında pivə içməyi təklif etdi. Mail çay kənarına yaxın bir yerdə avtomobili saxladı. Biz avtomobildən düşüb yolun kənarında pivə içdik. Pivədən sonra avtomobilə doğru hərəkət etdik. Qabaqda Mail, arxasınca Aqil, onlardan lap arxada özüm hərəkət etdim. Mail avtomobilə çatmağa az qalmış, Aqil qəflətən bıçağı çıxararaq arxadan onun kürək nahiyəsinə zərbə endirdi".

Təqsirləndirilən şəxsin sözlərinə görə, Mail tez avtomobilin kabinəsinə daxil olub və ayaqları ilə Aqilə müqavimət göstərib: "Buna baxmayaraq Aqil Mailə bir neçə bıçaq zərbəsi də endirdi. Bütün bunlar ani, qısa vaxt ərzində baş verdiyi üçün özümü itirdim. Hadisəyə müdaxilə edə bilmədim. Maili öldürdükdən sonra Aqil meyiti avtomobilin qabaq oturacağına qoydu, avtomobili yol kənarında meşəlik sahəyə gətirdi. Maşını dərəyə doğru itələdi".

"Üzərimə zorlama cinayəti qoyulacağı ilə hədələnmişəm"

Vəfalı Əliyev ifadəsində daha sonra göstərib ki, Aqil Baxşıyev ona Mail Ağayevi öldürəcəyi barədə heç nə deməyib: "Mail Ağayevi öldürmək üçün məndən kömək istəmədi. İbtidai istintaq zamanı təqsirimi etiraf etməyimin səbəbi odur ki, həmin vaxt təzyiqə məruz qalmışam, üzərimə zorlama cinayəti qoyulacağı ilə hədələnmişəm. Buna görə qorxaraq Mail Ağayevin ölümündə iştirak etməyimi boynuma götürməyə məcbur olmuşam".

Digər təqsirləndirilən Aqil Baxşıyev də ifadəsində göstərib ki, Mail Ağayevi tək öldürüb, qətl barədə qabaqcadan Vəfalıya deməyib, Mailin öldürülməsində Vəfalı iştirak etməyib.

Lənkəran Ağır Cinayətlər Məhkəməsinin hökmü ilə Vəfalı Əliyev 18 il, Aqil Baxşıyev 18 il 6 ay, Nailə Ağayeva isə 17 il 6 ay müddətinə azadlıqdan məhrum edilib.

Hökmdən narazı qalan Vəfalı Əliyev apelyasiya şikayəti verib. O, qətl hadisəsini törətmədiyini qeyd edərək, əməlini Cinayət Məcəlləsinin 307.1-ci (ağır və ya xüsusilə ağır cinayətin hazırlanmasını və ya törədilməsini bilərək həmin cinayət barəsində xəbər verməmə) maddəsinə tövsif edilməsini, ona həmin maddənin sanksiyasında nəzərdə tutulmuş cəzadan da aşağı həddə cəza təyin olunmasını xahiş edib.

Nailə Ağayeva da apelyasiya şikayəti verib və cəzasının yüngülləşdirilməsini xahiş edib.

Digər təqsirləndirilən Aqil Baxşıyev isə apelyasiya şikayəti verməyib.

Vəfalı Əliyev və Nailə Ağayevanın şikayəti araşdırılması üçün Şirvan Apelyasiya Məhkəməsinə göndərilib.

Şikayət hakim Etibar Camalovun sədrlik etdiyi kollegiyada araşdırılıb və sonda şikayətlər təmin olunmayıb.

Telegramda izləyin

instagramda izləyin