Uşaqlarda qasıq yırtığı necə əmələ gəlir və müalicəsi necə aparılmalıdır?

Yırtıqların arasında qasıq yırtıqları uşaqlarda daha tez-tez rast gəlinən patologiyadır. Uşaqlarda qasıq yırtıqları anadangəlmə patologiyadır.Bunun səbəbi qasıq kanalının bətndaxili inkişafının pozulmasıdır.Qasıq yırtığı valideynlər arasında daha çox "qrıja" kimi tanınır.Uşaqlarda qasıq yırtığının əmələ gəlmə səbəbini başa düşmək üçün mütləq bətindaxili dövrdə xayanın xayalığa enmə prosesini nəzərdən keçirmək lazımdır.
Sonxeber.az-a açıqlama verən pediatr Günay Rəsulova bildirib ki,yırtıq uşaq doğulduqdan dərhal sonra, bəzi halarda 1 yaşına yaxın, bəzən daha böyük yaşlarda özünü büruzə verə bilər: "Yırtığın əsas simptomu uşağın qasıq nahiyəsində olan şişkinlik, asimmetriyadır. Bu şişkinlik uşaq ayaq üstə olanda daha yaxşı görünür, uzananda isə "itir". İlk dəfə bu şişkinlik uşaq çoxlu ağladıqdan, qışqırdıqdan, öskürdükdən, qəbizlik zamanı gücəndikdən sonra müşahidə oluna bilər. Lakin bu o demək deyil ki, öskürək, ağlama və ya qəbizlik yırtığın inkişafına səbəb olub. Bu yırtıqlar anadangəlmə pozulmadır".
Bu patologiyaya oğlanlarda daha tez-tez rast gəlinir. Bu onların fizioloji xüsusiyyətləri ilə bağlıdır. Yırtıqlar oğlanlarda sağ tərəfdə olur.Adətən şişkinlik birtərəfli, çox nadir hallarda ikitərəfli olur.
Pediatrın sözlərinə görə, yırtıq uşağı adətən narahat etmir."Məhz bu səbəbdən yırtıqlar uşaqlarda bir çox hallarda təsadüfən cərrahın profilaktik müayinəsi zamanı aşkar edilir. Yalnız böyük və ya sıxılmış yırtıqlar uşaqlarda narahatçılığa, ağrılara,ürəkbulanması və qusmaya səbəb olur".
Günay Rəsulova onu da bildirdi ki, qasıq yırtığının müalicəsi yalnız cərrahi üsulla olmalıdır."Uşağın böyüməsini gözləmək, bandajlardan istifadə etmək və ya öz-özlüyündə qasıq yırtığının bağlanması mümkün deyil".
Lamiyə Məmmədova

Telegramda izləyin