Azərbaycanın Qoşulmama Hərəkatına sədrliyi Qarabağ münaqişəsinin həllinə necə təsir edəcək?- Şərhlər

Xəbər verdiyimiz kimi Azərbaycan 2019-2022-ci illərdə Qoşulmama Hərəkatına sədrlik edəcək. Bu 3 il ərzində Dağlıq Qarabağ münaqişəsinin həlli istiqamətində müsbət nəticə əldə ediləcəkmi?

Bununla bağlı Sonxeber.az-a danışan deputat Aydın Mirzəzadə bildirib ki, Azərbaycanın dostu olan ölkələrin hər biri ərazi bütövlüyümüzü müdafiə edirlər:
"Tək bu dövlətlər deyil, beynəlxalq təşkilatlar da ərazi bütövlüyümüzlə bağlı bəyanatlar verir, bizi dəstəkləyirlər. 120 ölkənin Azərbaycanı yaxından tanıyacağını və Dağlıq Qarabağ problemi ilə bağlı məlumatlı olacağını gözləyirik. Dağlıq Qarabağ probleminin həllinə maksimum səylər göstərilir. Qoşulmama Hərəkatının da bu məsələdə Azərbaycana dəstək olması bizim gücümüzü daha da artıracaq".

"Atlas" Araşdırmalar Mərkəsizinin rəhbəri, politoloq Elxan Şahinoğlu qeyd edib ki, Azərbaycan 2011-ci ildə Qoşulmama Hərəkatına üzv olmaqda məqsədi bu təşkilata üzv dövlətlərlə siyasi, iqtisadi əlaqələri genişləndirmək, informasiya mübadiləsini gücləndirmək ən önəmlisi isə Dağlıq Qarabağ münaqişəsinin həllində bu ölkələrin dəstəyini qazanmaq idi: "Bu o demək deyil ki, Bakı bəyannaməsində Qarabağ məsələsində bizə dəstək ifadə olunacaq və bu münaqişənin həllində gələcək 3 ildə müsbət təsir edə bilər. Ona qalsa daha güclü olan BMT-nin 4 qətnaməsi var ki, hələ də kağız üzərində qalır. Bundan əlavə, İslam Əməkdaşlıq Təşkilatı hər il Azərbaycanın xeyrinə sənədlər və bəyanatlar qəbul edir. Amma bu da münaqişənin həllini sürətləndirmir. Əlbəttə, bu təşkilata üzvlük bizim üçün əhəmiyyətlidir. Lakin bu təşkilata üzvlük və xeyrimizə qəbul olunan bəyanatlar Dağlıq Qarabağ münaqişəsinin həllinin sürətləndirmək iqtidarında deyil. Biz bunu 25 ildə gördük. Yəni Azərbaycanın xeyrinə qəbul edilən qətnamələr real mexanizmə çevrilə bilmir. Gürcü tərəfi haqlıdır. Münaqişənin həllini biz özümüz sürətləndirməliyik. Gözləməməliyik ki, hər hansı bir qətnamə və ya bəyanat münaqişənin həllini sürətləndirəcək".

Aysel Yusifqızı

Telegramda izləyin