ŞƏHİD QARDAŞI: Dözülməz dərddir bu, dözə bilmirik - FOTOLAR

Qoşunların təmas xəttində şəhid olan Azərbaycan Ordusunun əsgəri, kəşfiyyatçı Bağırov Emin İmran oğlunun ailəsi şəhid oğullarının yoxluğuna dözə bilmir.

Sonxeber.az BiG.AZ-a istinadən xəbər verir ki, şəhidimizin qardaşı Y.Bağırov şəhid qardaşının şəxsi əşyalarının fotosunu paylaşıb.

Y.Bağırov "Qardaşımın geyimləri, işlətdiyi əşyalar, bugün döyüş yoldaşları gətirib... Qoxusu hələ də üstündədi. Sənə qurban olum qardaşım. Mən indidən sənin üçün darıxmışam, qardaşım hardasan? Sənə qurban olum Eminim. Arxa dayağım yoxdu daha. Mənə demişdin ki, müharibə olsa yaralılara ilk tibbi yardımı öyrənirik. Amma sənə heç kim kömək ola bilmədi".

Şəhidimizin şəxsi əşyalarının fotosuna yaxınları da şərh yazıb: "Nə gözəl qoxusu varmış şəhidimin, cənnət qoxusu gəlir", "Allahım dözülməz dərddir bu ... dözə bilmirik"...

Şəhid E.Bağırov Binəqədi qəsəbəsində dəfn edilib.

Bitib tükənməyən insan izdihamı ilə müşayiət olunan dəfn mərasimində sakinlər şəhidi son mənzilə yola salıblar. Binəqədi qəsəbə qəbristanlığında torpağa tapşırılan Bağırov Emin İmran oğlu Azərbaycan Respublikasının Dövlət Himninin sədaları altında, yaylım atəşinin açılması ilə torpağa tapşırılıb.

Daha sonra şəhid cənazəsinə bükülmüş Azərbaycan bayrağı şəhidin atasına təhvil verilib.

Allah bütün şəhidlərimizə rəhmət etsin!

Mirvari Nəcəf

Telegramda izləyin